بۇگىن موڭعوليا پرەزيدەنتى ۋحنااگين حۋرەلسۋح تۇركيا رەسپۋبليكاسىنىڭ پرەزيدەنتى رەجەپ تايىپ ەردوعاننىڭ شاقىرۋىمەن انكاراعا مەملەكەتتىك ساپارمەن باردى، دەپ حابارلايدى "ادىرنا" ۇلتتىق پورتالى مونتسامە-گە سىلتەمە جاساپ.
موڭعوليا پرەزيدەنتى ۋحنااگين حۋرەلسۋحتى، ءبىرىنشى حانىم لۋۆساندورجين بولورتسەتسەگتى جانە ولارمەن بىرگە كەلگەن دەلەگاتسيانى انكارا قالاسىنداعى "ەسەنبوا" حالىقارالىق اۋەجايىندا تۇركيا رەسپۋبليكاسىنىڭ ىشكى ىستەر ءمينيسترى الي ەرلىكايا جانە موڭعوليانىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى گ. مۋنحبايار قارسى الدى.
موڭعول كوشباسشىسىنىڭ بۇل ساپارى ەكى ەل اراسىنداعى ديپلوماتيالىق قاتىناستاردىڭ ورناعانىنا 55 جىل تولۋىنا ورايلاستىرىلعان. بۇل - سوڭعى 21 جىلدا موڭعوليا پرەزيدەنتىنىڭ تۇركياعا جاساعان العاشقى ساپارى.
مەملەكەتتىك ساپار اياسىندا ەكى ەل پرەزيدەنتتەرى جەكە كەزدەسۋلەر، رەسمي كەلىسسوزدەر وتكىزىپ، بۇقارالىق اقپارات قۇرالدارى الدىندا مالىمدەمە جاسايدى.
ساپار بارىسىندا ءبىلىم بەرۋ، جاستار جانە سپورت، دەنساۋلىق ساقتاۋ جانە مەديتسينالىق عىلىمدار سالاسىنداعى ىنتىماقتاستىق تۋرالى ۇكىمەتارالىق كەلىسىمدەر، سونداي-اق قورشاعان ورتانى قورعاۋ، پايدالى قازبالاردى ءوندىرۋ، كولىك، ينفراقۇرىلىم، ورمان شارۋاشىلىعى، قۇقىق جانە ادىلەت سالالارىنداعى ىنتىماقتاستىق تۋرالى ماڭىزدى 10-نان استام قۇجاتقا قول قويۋ جوسپارلانعان.
موڭعوليا مەن تۇركيا اراسىنداعى ديپلوماتيالىق قارىم-قاتىناستار 1969 جىلى 24 ماۋسىمدا ورناعان. موڭعوليا 1997 جىلى انكارادا ءوز ەلشىلىگىن اشسا، تۇركيا 1996 جىلى ۇلان-باتىردا ءوز ەلشىلىگىن اشقان.
ەسكە سالا كەتەيىك، 12 قاڭتار كۇنى ۇلان-باتوردا مىڭداعان ادام جينالىپ، نارازىلىق شەرۋىن وتكىزىپ، ۇكىمەتتەن سىبايلاس جەمقورلىقپەن كۇرەس، جولداعى كەپتەلىستەردى ازايتۋ، سالىقتاردى تومەندەتۋ سىندى ماسەلەلەردى شەشۋدى تالاپ ەتتى.
