نيۋ-يورك سوتى اقش-تىڭ جاڭادان سايلانعان پرەزيدەنتى دونالد ترامپقا الاياقتىق ءىسى بويىنشا ۇكىم شىعاردى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
سوت ترامپتى كىنالى دەپ تانىعانىمەن وعان جازا تاعايىنداماعان. ۇكىم «شارتسىز بوساتۋ» تۇرىندە شىعارىلدى.
سوت وتىرىسى كەزىندە سۋديا حۋان مەرچان ترامپقا:
«ءسىز ەكىنشى پرەزيدەنتتىك مەرزىمىڭىزدى باستايتىن ۋاقىتتا ساتتىلىك تىلەيمىن»، – دەپ مالىمدەدى.
سۋديانىڭ ايتۋىنشا، بۇل شەشىم ەلدىڭ ەڭ جوعارى لاۋازىمىنا اسەر ەتپەيتىن جالعىز زاڭدى ۇكىم بولعان.
دونالد ترامپ سوت وتىرىسىنا ۆيدەوبايلانىس ارقىلى قاتىسىپ، العاش رەت ءوز پىكىرىن ءبىلدىردى. بۇعان دەيىن ول وزىنە تاعىلعان ايىپتارعا قاتىستى تۇسىنىكتەمە بەرۋدەن باس تارتقان ەدى.
سوتتا ترامپ بارلىق ايىپتاۋلاردى جوققا شىعارىپ، بۇل ءىستىڭ ساياسي ماقساتتا قوزعالعانىن ايتتى. ول بۇل پروتسەستى «ساياسي شابۋىل» دەپ اتاپ، باستى ماقسات – ونىڭ اق ۇيگە قايتا ورالۋىنا كەدەرگى جاساۋ ەكەنىن جەتكىزدى.
سوت شەشىمىنەن كەيىن ترامپ Truth Social الەۋمەتتىك جەلىسىندە:
«بۇل – راديكالدى دەموكراتتاردىڭ امەريكانى بۇزۋ ءۇشىن جاساعان تاعى ءبىر ءساتسىز ارەكەتى. شىن مانىندە، ەشقانداي قىلمىس بولعان جوق، بۇل ايىپتاۋلاردى تولىعىمەن جوققا شىعارۋ كەرەك»، – دەپ جازدى.
سونىمەن قاتار، ترامپ سوت ۇكىمىن اپپەلياتسياعا بەرەتىنىن مالىمدەدى.
ايتا كەتەيىك، اقش پرەزيدەنتى بولىپ قايتا سايلاناتىن دونالد ترامپتى ۇلىقتاۋ سالتاناتىنا ون كۇن قالعاندا وعان قاتىستى قىلمىستىق ءىستىڭ ۇكىمى جاريالاناتىنى تۋرالى حابارلاعان ەدىك.
