«قازاقمىس» كورپوراتسياسىنىڭ شاحتەرلەرى ءوز تالاپتارىن جەتكىزۋ ءۇشىن پرەزيدەنت قاسىم-جومارت توقاەۆقا بەينەۇندەۋ جاسادى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
«ءبىز سىزگە جانايقايىمىزدى جەتكىزگىمىز كەلەدى. ءۇش كۇن ءوتتى، بىراق «قازاقمىس» كورپوراتسياسىنىڭ باسشىلىعى ءبىزدى ادام سانامايدى، شاحتەرلەرمەن، جۇمىسشىلارمەن ساناسپايدى. ءبىزدىڭ اكتسيامىز قالاي باستالدى؟ بۇعان دەيىن ءبىز جۇمىسشىلار اراسىنان باستاماشىل توپ قۇردىق. بۇل توپ حالىقتىڭ تالاپ-تىلەكتەرىن باسشىلىققا جەتكىزۋدى ماقسات ەتتى، سول ءۇشىن جۇمىسشىلار ءوز وكىلدەرىن سايلادى. الايدا بۇل وكىلدەردى ۇقك قىزمەتكەرلەرى قۋدالاپ، جالاقىنى كوتەرۋ تالابىمىز ءۇشىن سوتقا تارتامىز دەپ قورقىتتى. بۇل ەرەۋىل دە، ميتينگ تە ەمەس، بۇل – جۇمىسشىلار مەن جۇمىس بەرۋشى اراسىنداعى ەڭبەك داۋى»، – دەدى شاحتەرلەردىڭ وكىلى جەر استىندا تۇسىرىلگەن بەينەجازبادا.
شاحتەرلەر ينتەرنەتتە تاراعان جالاقى تۋرالى مالىمەتتەردىڭ شىندىققا جاناسپايتىنىن ايتتى.
«ينتەرنەتتە شاحتەرلەردىڭ ەڭ تومەنگى جالاقىسى 800 مىڭ تەڭگە دەگەن جالعان اقپارات تاراتىلۋدا. سوڭعى ءۇش كۇندە مۇندا «قازاقمىس» باسشىلىعىنىڭ وكىلدەرى، ساتباەۆ قالاسى اكىمىنىڭ ورىنباسارى، پروكۋرور ءتۇسىپ، بىزبەن سويلەستى. ءبىز بۇل كەزدەسۋدە ءۇش تالاپ قويدىق:
- ۇقك جانە ىشكى ىستەر ورگاندارى تاراپىنان باستاماشىل توپ مۇشەلەرىن قۋدالاۋدى توقتاتۋ.
- 13-ءشى جالاقىنى تولىق كولەمدە تولەۋ. قازىرگى كەزدە باسشىلىق تەك بازالىق جالاقىنى تولەپ وتىر، ال ءبىز تولىق كولەمدە 13-ءشى جالاقى تالاپ ەتەمىز.
- جالاقىنى 100%-عا ارتتىرۋ»، – دەدى شاحتەرلەر وكىلى.
شاحتەرلەردىڭ ايتۋىنشا، العاشقى كۇنى كەلىسىمگە قول جەتكىزىلمەگەن. ال ەكىنشى كۇنى پروكۋرور، اكىمدىك وكىلدەرى جانە ارداگەرلەر شاحتاعا قايتا تۇسسە دە، ماسەلە شەشىلمەگەن.
«باسشىلىق بىزبەن سويلەسۋدەن باس تارتۋدا. ءبىز جالاقىنى 100%-عا ارتتىرۋ تالابىمىزدى قايتا قاراپ، 300 مىڭ تەڭگە قوسىمشا تولەۋدى جانە توقسان سايىن 50 اەك كولەمىندە سىياقى بەرۋدى تالاپ ەتەمىز. سونداي-اق 13-ءشى جالاقىنى تولىق كولەمدە تولەۋىمىزدى سۇرايمىز. بۇل ۆيدەوۇندەۋدى شىندىقتى جەتكىزۋ ءۇشىن جاساپ وتىرمىز. ءبىز قوعامدىق ءتارتىپتى بۇزبايمىز، زاڭسىز ارەكەت جاسامايمىز. تەك تالاپتارىمىزدىڭ ورىندالۋىن سۇرايمىز»، – دەپ مالىمدەدى شاحتەرلەر.
17 جەلتوقساننان باستالعان ەرەۋىلگە باسقا ايماقتارداعى شاحتەرلەر دە قولداۋ كورسەتتى. 20 جەلتوقساندا جامبىل وبلىسىنداعى تاعى ءبىر كەنىشتە كەلىسىمگە قول جەتكىزىلگەنى تۋرالى حابارلاندى. دەگەنمەن، ۇلىتاۋ وبلىسىنداعى شاحتاعا پوليتسيانىڭ ارنايى جاساعى كىرگەنى جايلى اقپارات تارادى.
