قازاقستاندا «جاساندى ينتەللەكت تۋرالى» جاڭا زاڭ كۇشىنە ەندى. زاڭعا قول قويىلعان ساتتەن باستاپ 60 كۇن ءوتتى جانە بەلگىلەنگەن راسىمدەرگە سايكەس، بۇگىننەن باستاپ قۇجات تولىق كولەمدە قولدانىسقا ەنگىزىلدى. بۇل تۋرالى جاساندى ينتەللەكت جانە تسيفرلىق دامۋ مينيسترلىگى ءمالىم ەتتى، دەپ حابارلايدى "ادىرنا".
قابىلدانعان زاڭ ەلدە جاساندى ينتەللەكتىنى قولدانۋدىڭ قۇقىقتىق نەگىزىن قالىپتاستىرىپ، سالاداعى مەملەكەتتىك ساياساتتىڭ باستى قاعيداتى — ادام، ونىڭ قۇقىقتارى، بوستاندىقتارى مەن ءال-اۋقاتىنىڭ باسىمدىعى تۋرالى ەرەجەلەردى بەكىتەدى. ادام، ونىڭ ءومىرى مەن ەرىك-جىگەرى جاساندى ينتەللەكت جۇيەلەرىن قۇرۋ جانە پايدالانۋدا ەڭ جوعارعى قۇندىلىق رەتىندە قاراستىرىلادى. جي-ءدى قولدانۋ ادامنىڭ سانالى تۇردە شەشىم قابىلداۋ قابىلەتىن شەكتەمەۋى ءتيىس، ال ازاماتتاردىڭ ەركىندىگى تەحنولوگيالاردى قولدانۋدىڭ بارلىق كەزەڭىندە ساقتالۋى قاجەت.
«زاڭ جاساندى ينتەللەكتىنى پايدالانۋدى، اتاپ ايتساق ادىلدىك پەن تەڭدىك، الگوريتم اشىقتىعى مەن تۇسىنىكتىلىگى، جاۋاپكەرشىلىك پەن باقىلاۋدا بولۋى، دەرەكتەر مەن قۇپيالىقتى قورعاۋ، سونداي-اق جي جۇيەلەرىنىڭ قاۋىپسىزدىگى مەن سەنىمدىلىگى تۋرالى ەرەجەلەردى ايقىندايدى. پايدالانۋشىلارعا جاساندى ينتەللەكت جۇيەلەرىنىڭ مۇمكىندىكتەرى، سيپاتتامالارى مەن شەكتەۋلەرى تۋرالى تولىق اقپارات ۇسىنىلۋى شارت»، – دەلىنگەن حابارلامادا.
ازاماتتار اۆتوماتتاندىرىلعان دەرەكتەردى وڭدەۋدىڭ قولدانىلۋى، ونىڭ سالدارى، مۇنداي وڭدەۋگە قارسىلىق ءبىلدىرۋ مۇمكىندىگى، سونداي-اق ءوز قۇقىقتارى مەن زاڭدى مۇددەلەرىن قورعاۋ تەتىكتەرى تۋرالى حاباردار بولۋعا قۇقىلى.
قۇجات جاساندى ينتەللەكت جۇيەلەرىنىڭ يەلەرى مەن پايدالانۋشىلارى اراسىنداعى جاۋاپكەرشىلىكتى ناقتىلايدى. جي جۇيەلەرىنىڭ ومىرلىك تسيكلىنىڭ بارلىق قاتىسۋشىلارى ولاردىڭ جۇمىسىن باقىلاۋدى قامتاماسىز ەتۋگە، تاۋەكەلدەردى باسقارۋعا جانە جۇيەلەر جۇمىسىنىڭ ناتيجەلەرى ءۇشىن قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىك الۋعا مىندەتتى.
جاساندى ينتەللەكت جۇيەلەرىن قۇرۋ جانە پايدالانۋ قورشاعان ورتاعا تەرىس اسەر ەتپەۋى، سونداي-اق ەنەرگيا تيىمدىلىگى تالاپتارىن ساقتاي وتىرىپ جۇزەگە اسىرىلۋى ءتيىس.
«جي جۇيەلەرىن پايدالانۋ جەكە دەرەكتەر مەن قۇپيا اقپاراتتى قورعاۋ تالاپتارى ساقتالعان جاعدايدا عانا رۇقسات ەتىلەدى. زاڭ دەرەكتەرگە رۇقساتسىز قول جەتكىزۋدىڭ الدىن الۋ شارالارىن، ساپالى دەرەكتەردى پايدالانۋدى، جي جۇيەلەرىنىڭ قاۋىپسىزدىگى مەن سەنىمدىلىگىن قامتاماسىز ەتۋدى كوزدەيدى»، – دەپ حابارلادى ۆەدومستۆودان.
قۇجاتقا سايكەس، جاساندى ينتەللەكت جۇيەلەرى تاۋەكەل دەڭگەيى بويىنشا — تومەن، ورتا جانە جوعارى تاۋەكەلدى جۇيەلەرگە جىكتەلەدى. ماڭىزدى سالالاردا نەمەسە مەملەكەتتىك اقپاراتتىق رەسۋرستاردى قالىپتاستىرۋ كەزىندە قولدانىلاتىن جوعارى تاۋەكەلدى جۇيەلەر اقپاراتتىق قاۋىپسىزدىك تالاپتارى بويىنشا مەملەكەتتىك جۇيەلەرگە تەڭەستىرىلەدى.
ەندى قازاقستان اۋماعىندا:
- ءمانيپۋلياتيۆتى ادىستەردى قولداناتىن;
- ادامنىڭ جاسىنا، دەنساۋلىق جاعدايىنا نەمەسە الەۋمەتتىك مارتەبەسىنە بايلانىستى وسال تۇستارىن پايدالاناتىن;
- الەۋمەتتىك نەمەسە بيومەتريالىق كەمسىتۋشىلىككە جول بەرەتىن;
- ادامنىڭ ەموتسياسىن ونىڭ كەلىسىمىنسىز انىقتايتىن;
- جەكە دەرەكتەر تۋرالى زاڭنامانى بۇزاتىن;
- تىيىم سالىنعان كونتەنت جاسايتىن نەمەسە تاراتاتىن جاساندى ينتەللەكت جۇيەلەرىن قۇرۋعا جانە پايدالانۋعا تىيىم سالىنادى.
زاڭ جاساندى ينتەللەكتىنى پايدالانۋدىڭ اشىقتىعىنا قويىلاتىن تالاپتاردى بەلگىلەيدى. پايدالانۋشىلار تاۋارلار، جۇمىستار نەمەسە قىزمەتتەر جي-ءدى قولدانۋ ارقىلى جاسالعانىن ءبىلۋى شارت. سينتەتيكالىق كونتەنت مىندەتتى تۇردە تاڭبالانۋعا جانە پايدالانۋشىلار ءۇشىن تۇسىنىكتى ەسكەرتۋمەن بەلگىلەنۋى ءتيىس.
جاساندى ينتەللەكتىنى پايدالانۋ ارقىلى جاسالعان تۋىندىلار ادامنىڭ شىعارماشىلىق ۇلەسى بولعان جاعدايدا عانا «اۆتورلىق قۇقىق وبەكتىسى» دەپ تانىلادى. ادامنىڭ زياتكەرلىك قىزمەتىنىڭ ناتيجەسى ارقىلى الىنعان ماتىندىك سۇراۋلار (پرومپتتار) دا اۆتورلىق قۇقىقپەن قورعالادى. اۆتور نەمەسە قۇقىق يەسى تىيىم سالماعان جاعدايدا عانا جي مودەلدەرىن وقىتۋ ءۇشىن تۋىندىلاردى پايدالانۋعا رۇقسات ەتىلەدى.
«جاساندى ينتەللەكت تۋرالى» زاڭنىڭ كۇشىنە ەنۋى قازاقستاندا جاۋاپتى، قاۋىپسىز جانە ادامعا باعدارلانعان جاساندى ينتەللەكتىنى دامىتۋداعى ماڭىزدى كەزەڭ. بۇل مودەل يننوۆاتسيالار، ازاماتتاردىڭ قۇقىقتارىن قورعاۋ جانە تسيفرلىق ەكونوميكانىڭ ورنىقتى دامۋى اراسىنداعى تەپە-تەڭدىكتى قامتاماسىز ەتۋگە باعىتتالعان.
"ناعىز تاربيە" - شىمكەنتتىك وقۋشى اناسى تۇسكى اسقا دەپ بەرگەن اقشاعا ماكارون الىپ، تۇركياعا جونەلتتى
