2025 جىلدىڭ 11 قاڭتارىندا قازاقستان عىلىمىنىڭ ءىرى تۇلعاسى، فيلولوگيا عىلىمدارىنىڭ دوكتورى، پروفەسسور، ابايتانۋشى جانە باۋىرجانتانۋشى عالىم مەكەمتاس مىرزاحمەتۇلى دۇنيەدەن ءوتتى، دەپ حابارلايدى "ادىرنا" ۇلتتىق پورتالى.
1930 جىلى 9 مامىردا تۇركىستان وبلىسى، تۇلكىباس اۋدانى، مايتوبە اۋىلىندا دۇنيەگە كەلگەن. مەكەمتاس مىرزاحمەتۇلى 95 جاسىنا قاراعان شاعىندا ومىردەن ءوتتى.
عالىمنىڭ عىلىمعا دەگەن قۇشتارلىعى مەن تاباندىلىعى ونى قازاق ادەبيەتى مەن مادەنيەتىنىڭ تەرەڭ زەرتتەۋشىسى ەتتى. 1953 جىلى اباي اتىنداعى قازاق پەداگوگيكالىق ينستيتۋتىنىڭ فيلولوگيا فاكۋلتەتىن بىتىرگەن. كەيىن اسپيرانتۋراعا ءتۇسىپ، بۇل جولدا باۋىرجان مومىشۇلىنىڭ قولداۋى ونىڭ ومىرىندەگى ماڭىزدى كەزەڭ بولدى.
عالىم ءومىر بويى اباي قۇنانبايۇلىنىڭ شىعارماشىلىعىن زەرتتەۋگە دەن قويىپ، "تولىق ادام" ىلىمىنە تەرەڭ تالداۋ جاسادى. ابايدىڭ "تولىق ادام" كونتسەپتسياسىنىڭ نەگىزىن اشا وتىرىپ، بۇل ءىلىمدى جاستاردىڭ رۋحاني دامۋىنىڭ ىرگەتاسى رەتىندە قاراستىردى.
مەكەمتاس مىرزاحمەتۇلىنىڭ ەڭبەكتەرىنىڭ ىشىندە اباي تۋرالى ون تومدىق ءىرى زەرتتەۋى ەرەكشە ورىن الادى. سونىمەن قاتار ول ياساۋي ءىلىمى، شاكارىمنىڭ "ار عىلىمى" سياقتى فيلوسوفيالىق جۇيەلەردىڭ دامۋىنا قاتىستى قۇندى دەرەكتەر جيناقتاپ، قازاق رۋحانياتىنىڭ بيىگىندەگى تۇلعاعا اينالدى.
مەكەمتاس مىرزاحمەتۇلى قازاقستاننىڭ ءتۇرلى عىلىمي-زەرتتەۋ ينستيتۋتتارىندا، ۋنيۆەرسيتەتتەردە قىزمەت اتقاردى. 1975-1991 جىلدارى قازاقستان عىلىم اكادەمياسى ادەبيەت جانە ونەر ينستيتۋتىندا ابايتانۋ ءبولىمىنىڭ مەڭگەرۋشىسى بولدى. سونىمەن قاتار ول قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ كافەدرا مەڭگەرۋشىسى جانە عىلىمي ورتالىقتارىنىڭ جەتەكشىسى قىزمەتىن اتقارعان.
مەكەمتاس مىرزاحمەت تۇركىستان وبلىسى تۇلكىباس اۋدانىندا جەرلەنۋى مۇمكىن.
