سەنات ورىس ءتىلى جونىندەگى حالىقارالىق ۇيىم قۇرۋ شارتىن راتيفيكاتسيالاۋ تۋرالى زاڭدى قابىلدادى، دەپ حابارلايدى "ادىرنا" ۇلتتىق پورتالى.
اتالعان كەلىسىمگە 2023 جىلى بىشكەكتەگى تمد ەلدەرى باسشىلارىنىڭ سامميتىندە قول قويىلعان. ۇيىمنىڭ نەگىزگى ماقساتى – ورىس ءتىلىن حالىقارالىق دەڭگەيدە ىلگەرىلەتۋ جانە مەملەكەتارالىق بايلانىس پەن كوممۋنيكاتسيا قۇرالى رەتىندە دامىتۋ. بۇل ۇيىم ۇكىمەتارالىق سيپاتقا يە بولىپ، حالىقارالىق قۇقىق سۋبەكتىسى رەتىندە ارەكەت ەتەدى.
زاڭ جوباسى بويىنشا بايانداما جاساعان سەناتور اندرەي لۋكين بۇل ۇيىمنىڭ ماڭىزدىلىعىن اتاپ ءوتتى. ونىڭ سوزىنەن كەيىن سەنات توراعاسى ماۋلەن اشىمباەۆ سەناتورلاردان سۇراقتار بار-جوعىن سۇراعاندا، ەشقانداي سۇراق قويىلمادى.
سەناتور الىشەر ساتىبالديەۆ:
"ورىس ءتىلى بۇۇ-نىڭ رەسمي تىلدەرىنىڭ ءبىرى ءارى ەۋروپا مەن تمد ەلدەرىندە كەڭىنەن قولدانىلادى. بۇل ءتىل ايماقتىق جانە حالىقارالىق ماسەلەلەردى شەشۋدە ماڭىزدى ءرول اتقارادى", - دەدى.
مينيستر ساياسات نۇربەك بولسا:
"ۇيىمنىڭ ماقساتى – ورىس ءتىلىنىڭ قولدانىلۋ اياسىن جاھاندىق دەڭگەيدە كەڭەيتۋ", - دەپ پىكىر ءبىلدىردى.
ءماجىلىس دەپۋتاتى ەرمۇرات باپي زاڭعا بايلانىستى ماڭىزدى قادام دەپ باعالادى.
"قازاقستاندا ورىس ءتىلىنىڭ بولاشاعىنا الاڭداۋدىڭ قاجەتى جوق. بۇل جوبا پرەزيدەنت قاسىم-جومارت توقاەۆتىڭ سىرتقى ساياساتتاعى ماڭىزدى قادامى دەپ سانالادى", - دەدى.
ال ۇيىمدى قۇرۋ يدەياسى 2022 جىلى قازاقستان پرەزيدەنتى قاسىم-جومارت توقاەۆ ورىس ءتىلىن قولداۋ جانە دامىتۋ جونىندەگى حالىقارالىق ۇيىم قۇرۋ يدەياسىن ۇسىنعان ەدى. رەسەي پرەزيدەنتى ۆلاديمير پۋتين بۇل باستامانى تولىق قولدايتىنىن جەتكىزدى. توقاەۆ 2023 جىلى بىشكەكتەگى سامميتتە وسى كەلىسىمگە قول قويۋدى «تاريحي شەشىم» دەپ اتادى.
قازاقستان بۇل ۇيىمدى قارجىلاندىرۋعا 131 ميلليون تەڭگە ءبولۋدى جوسپارلاپ وتىر. ۇيىمنىڭ شەشىمدەرى كونسەنسۋس نەگىزىندە قابىلداناتىن بولادى.
سەناتورلاردىڭ قولداۋىمەن زاڭ جوباسى قابىلداندى، بۇل قادام قازاقستاننىڭ سىرتقى ساياساتتاعى كوپۆەكتورلى ۇستانىمىنىڭ ءبىر كورىنىسى رەتىندە باعالانىپ وتىر.
