قىرعىزستانداعى تەلەارنالار ەفيرلىك حابار تاراتۋداعى قىرعىز تىلىندەگى باعدارلامالاردىڭ ۇلەسىن 60 پايىزعا دەيىن ارتتىرۋى ءتيىس. بۇل تالاپ قولدانىستاعى زاڭنامادا كوزدەلگەن. بۇل تۋرالى 16 قاڭتار كۇنى مەديا وكىلدەرىمەن وتكەن جيىندا مادەنيەت، اقپارات جانە جاستار ساياساتى ءمينيسترىنىڭ ورىنباسارى مارات تاعاەۆ مالىمدەدى، دەپ حابارلايدى “ادىرنا”.
ونىڭ ايتۋىنشا، تەلەارنالار اقپان ايىنىڭ سوڭىنا دەيىن «قىرعىزفيلم» جانە «قىرعىزسەريال» ۇيىمدارىمەن كەلىسىمشارت جاساسۋى قاجەت. مەملەكەت تەلەارنالاردى ۇلتتىق تىلدەگى كونتەنتپەن قامتاماسىز ەتۋ ماقساتىندا بۇل مەكەمەلەردىڭ قورىنان 400-دەن استام فيلم، 40 مۋلتفيلم جانە 10 سەريالدى تەگىن ۇسىنعان.
تاعاەۆ زاڭ تالاپتارىنىڭ، اسىرەسە تىلگە قاتىستى نورمالاردىڭ قاتاڭ ساقتالۋى كەرەگىن اتاپ ءوتتى. ونىڭ سوزىنشە، كەيبىر جەكەمەنشىك تەلەارنالار قىرعىز تىلىندەگى ەسكى باعدارلامالاردى قايتا كورسەتۋ ارقىلى تالاپتى فورمالدى تۇردە ورىنداپ وتىر، الايدا جاڭا وتاندىق كونتەنت وندىرمەيدى.
ەسكە سالساق، 2024 جىلدىڭ تامىز ايىندا قىرعىزستاندا تەلەحابار تاراتۋدا مەملەكەتتىك ءتىلدىڭ قولدانىلۋىنا قاتىستى زاڭعا وزگەرىستەر ەنگىزىلىپ، قىرعىز تىلىندەگى باعدارلامالاردىڭ ۇلەسى 50 پايىزدان 60 پايىزعا دەيىن ارتتىرىلعان بولاتىن.
«ازاتتىق راديوسىنىڭ» مالىمەتىنشە، قىرعىزستانداعى شەتەلدىك تەلەارنالار اراسىندا رەسەيلىك ء«بىرىنشى ارنا»، «روسسيا 24»، «مادەنيەت» جانە «زۆەزدا» ارنالارى كەڭىنەن تارالعان.
