اباي وبلىسىندا جالعان ديپلوممەن جۇمىسقا ورنالاسقان «سەمەي ورمانى» رەزەرۆاتى قىزمەتكەرلەرى انىقتالدى. بۇل تۋرالى پروكۋراتۋرا مالىمدەدى، دەپ حابارلايدى “ادىرنا” ۇلتتىق پورتالى.
مامانداندىرىلعان تابيعاتتى قورعاۋ پروكۋراتۋراسى جوعارى وقۋ ورىندارىن بىتىرگەنى تۋرالى جالعان ديپلومدارمەن جۇمىس ىستەگەن رەزەرۆاتتىڭ 5 قىزمەتكەرلەرىن، ونىڭ ىشىندە ءبىر فيليال باسشىسىن انىقتاعان.
«سەمەي قالاسىنىڭ شاكارىم اتىنداعى ۋنيۆەرسيتەتتىڭ مالىمەتىنە سايكەس اتالعان قىزمەتكەرلەرگە ديپلوم بەرىلمەگەن. وسى فاكتىلەر بويىنشا قك 385-بابىنىڭ 3-بولىگى (جالعان قۇجاتتاردى جاساۋ، دايىنداۋ نەمەسە وتكىزۋ) بويىنشا سوتقا دەيىنگى تەرگەپ-تەكسەرۋلەر باستالىپ، ماتەريالدار پروتسەسسۋالدىق شەشىم قابىلداۋ ءۇشىن پوليتسياعا جولداندى»، – دەلىنگەن پروكۋراتۋرا تاراتقان اقپاراتتا.
بۇعان دەيىن «سەمەي ورمانىنىڭ» ورتەنگەن قالىڭ قاراعايى جۇزدەگەن ميلليونعا ساتىلىپ جاتقانى حابارلانعان. حابارلاندىرۋ مەملەكەتتىك اۋكتسيون سايتىندا پايدا بولدى. اۋكتسيون سايتىندا بىردەن 30 لوت جاريالاندى. ورتەنگەن اعاش ۋچاسكەلەرىنىڭ باعاسى 30 ملن تەڭگەدەن 150 ملن تەڭگەگە دەيىن بارادى. ساتۋشى – ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ "سەمەي ورمانى” مەملەكەتتىك ورمان تابيعي رەزەرۆاتى.
ەسكە سالا كەتسەك، 2023 جىلى 8 ماۋسىمدا “سەمەي ورمانى” رەزەرۆاتى اۋماعىندا ءورت بولىپ، سالدارىنان 14 ادام قازا تاپقان ەدى. 9 ماۋسىم كۇنى كەشكە قاراي ونىڭ اۋماعى 60 مىڭ گەكتارعا دەيىن ۇلعايىپ ۇلگەردى. قارالى قايعىعا بايلانىستى 12 ماۋسىم ەلىمىزدە ازا تۇتۋ كۇنى بولىپ جاريالانعان.
اباي وڭىرىندەگى ەل تاريحىنداعى ەڭ ءىرى ورتكە بايلانىستى توتەنشە جاعدايلار مينيسترلىگىنىڭ باسشىسى يۋري يلين قىزمەتىنەن بوساتىلىپ, ونىڭ ورنىنا سىرىم ءشارىپحانوۆ تاعايىندالدى (قازىر ول دا بۇل قىزمەتتە جوق).
