Abai oblysynda jalǧan diplommen jūmysqa ornalasqan «Semei ormany» rezervaty qyzmetkerlerı anyqtaldy. Būl turaly prokuratura mälımdedı, dep habarlaidy “Adyrna” ūlttyq portaly.
Mamandandyrylǧan tabiǧatty qorǧau prokuraturasy joǧary oqu oryndaryn bıtırgenı turaly jalǧan diplomdarmen jūmys ıstegen Rezervattyŋ 5 qyzmetkerlerın, onyŋ ışınde bır filial basşysyn anyqtaǧan.
«Semei qalasynyŋ Şäkärım atyndaǧy universitettıŋ mälımetıne säikes atalǧan qyzmetkerlerge diplom berılmegen. Osy faktıler boiynşa QK 385-babynyŋ 3-bölıgı (jalǧan qūjattardy jasau, daiyndau nemese ötkızu) boiynşa sotqa deiıngı tergep-tekseruler bastalyp, materialdar prosessualdyq şeşım qabyldau üşın polisiiaǧa joldandy», – delıngen prokuratura taratqan aqparatta.
Būǧan deiın «Semei ormanynyŋ» örtengen qalyŋ qaraǧaiy jüzdegen millionǧa satylyp jatqany habarlanǧan. Habarlandyru memlekettık auksion saitynda paida boldy. Auksion saitynda bırden 30 lot jariialandy. Örtengen aǧaş uchaskelerınıŋ baǧasy 30 mln teŋgeden 150 mln teŋgege deiın barady. Satuşy – Ekologiia jäne tabiǧi resurstar ministrlıgı Orman şaruaşylyǧy jäne januarlar düniesı komitetınıŋ "Semei ormany” memlekettık orman tabiǧi rezervaty.
Eske sala ketsek, 2023 jyly 8 mausymda “Semei ormany” rezervaty aumaǧynda ört bolyp, saldarynan 14 adam qaza tapqan edı. 9 mausym künı keşke qarai onyŋ aumaǧy 60 myŋ gektarǧa deiın ūlǧaiyp ülgerdı. Qaraly qaiǧyǧa bailanysty 12 mausym elımızde Aza tūtu künı bolyp jariialanǧan.
Abai öŋırındegı el tarihyndaǧy eŋ ırı örtke bailanysty tötenşe jaǧdailar ministrlıgınıŋ basşysy Iýrii İlin qyzmetınen bosatylyp, onyŋ ornyna Syrym Şärıphanov taǧaiyndaldy (qazır ol da būl qyzmette joq).
