يسپانيالىقتار سەيسەنبى كۇنى بولعان ۆالەنسيا پروۆينتسياسىنداعى كۇشتى سۋ تاسقىنىنا جاۋاپتىلاردى ىزدەي باستادى. ءباسپاسوز جانە الەۋمەتتىك جەلى قولدانۋشىلارى قۇتقارۋشىلاردى تىم كەش ەسكەرتۋ جاسادى، بيلىك مۇنداي اپاتقا دايىن بولماي شىقتى دەيدى.
سوڭعى مالىمەتتەر بويىنشا، يسپانيانىڭ شىعىسىنداعى قاتتى نوسەر مەن ودان كەيىنگى سۋ تاسقىنى سالدارىنان قازا تاپقاندار 158-دەن استى. ۆۆس ارناسى وسى تۋرالى ماقالاسىندا اپات توركىنىن انىقتاۋعا تىرىسقان.
ازاماتتىق قورعانىس قىزمەتى سەيسەنبى كۇنى كەشكە كوپتەگەن ەلدى مەكەندەردى سۋ باسقان كەزدە عانا قاۋىپ تۋرالى ەسكەرتۋ جاساعان.
«بۇل تراگەديانىڭ اۋقىمى حالىققا تىم كەش حابارلاندى ما دەگەن سۇراق تۋدىرادى. ازاماتتىق قورعانىس قىزمەتى قالالاردى سۋ باسقان كەزدە عانا ەسكەرتۋ جىبەردى» - دەپ جازادى يسپانيانىڭ El Mundo گازەتى.
گازەت جۇزدەگەن ادامنىڭ سەيسەنبىدەن سارسەنبىگە قاراعان ءتۇنىن وندىرىستىك ايماقتاردا نەمەسە جول بويىنداعى كولىكتەردە وتكىزگەنىن اتاپ ءوتتى. ويتكەنى كەشكە قاراي سۋ تاسقىنى سالدارىنان جولدار جابىلعان.
«مەر رەتىندە ماعان ەشكىم ماگرە وزەنى ارناسىنان اسىپ كەتۋى مۇمكىن دەپ ەسكەرتكەن جوق. ول قالانى سۋعا تولتىرىپ، كىر مەن قوقىسپەن جاۋىپ تاستادى»، - دەپ شاعىمداندى الكۋلديا قالاسىنىڭ مەرى اندرەۋ سالوم.
ەكىنشى جاعىنان، اليكانتە ۋنيۆەرسيتەتىنىڭ كليماتولوگى حورحە ولسينانىڭ ايتۋىنشا، يسپانيانىڭ مەتەورولوگيالىق قىزمەتى ادامدارعا ءوز ومىرلەرىنە قاۋىپ توندىرمەۋ ءۇشىن ۇيدە قالۋ كەرەكتىگىن ناقتى ەسكەرتكەن.
«بىراق ادامدار «قىزىل» ەسكەرتۋ السا دا، ومىرلەرىن قالىپتى كۇيدە وتكىزگىسى كەلەدى»، - دەدى ولسينا Cadena Ser راديوسىنىڭ ەفيرىندە.
كەيبىر ازاماتتار ۆالەنسيا پروۆينتسياسىنىڭ بيلىگىن قۇتقارۋ قىزمەتىنە اقشا ۇنەمدەدى دەپ ايىپتايدى.
پروۆينتسيانىڭ باسشىسى، كونسەرۆاتور كارلوس ماسون UVE - توتەنشە جاعداي قىزمەتىن جويۋ تۋرالى شەشىمىن قايتادان اقتاۋعا ءماجبۇر بولدى.
UVE-نى سوڭعى سايلاۋعا دەيىن پروۆينتسيادا بيلىكتە بولعان سولشىل ساياساتكەرلەر قۇرعان. وتكەن جىلعى سايلاۋدا جەڭىسكە جەتكەن كارلوس ماسون بۇل جاڭا مەكەمەنى بىردەن جاۋىپ، پايداسىنان شىعىنى كوپ دەگەن.
ەندى بۇل شەشىمدى ماسوننىڭ جانە ونىڭ كونسەرۆاتيۆتى حالىق پارتياسىنىڭ قارسىلاستارى قايتا سىنعا الىپ جاتىر.
ۆالەنسيا پروۆينتسياسىنىڭ بيلىگى UVE شىن مانىندە ويدان شىعارىلعان ۇيىم ەكەنىن ايتىپ، «ءورت سوندىرۋشىلەرى - ءنول، ماتەريالدىق قامتاماسىز ەتۋ - ءنول، تيىمدىلىك - ءنول» دەپ جاۋاپ بەردى.
كوپشىلىك كارلوس ماسوندى سەيسەنبى كۇنى كەشكى التىدان باستاپ جاۋىن-شاشىن ازايادى دەپ ۋادە بەرگەنى ءۇشىن دە ايىپتاۋدا. ازايۋدىڭ ورنىنا كەشكى ۋاقىتتا اعىن سۋ قالالار مەن اۋىلداردى باسىپ، كولىكتەردى اعىزىپ، جولداردى شايىپ كەتتى.
ماسون بۇعان جاۋاپ رەتىندە دۇيسەنبىدەن باستاپ قۇتقارۋ قىزمەتتەرى جوعارى دايىندىق رەجيمىندە بولعانىن جانە اپاتتىڭ توتەنشە سيپاتىنا بايلانىستى ادامدارعا ناقتى نۇسقاۋ بەرۋ وتە قيىن ەكەنىن ايتتى.
«ساراپشىلاردىڭ ايتۋىنشا مۇنداي جاعداي بۇرىن-سوڭدى بولماعان»، - دەگەن پروۆينتسيا باسشىسى.
كليماتتىڭ وزگەرۋىنە قارسى بەلسەندىلەر يسپانياداعى سۋ تاسقىنىنىڭ جاھاندىق جىلىنۋدى توقتاتۋ ءۇشىن جىلدام ءارى باتىل ارەكەت ەتۋ قاجەتتىگىن ەسكە سالاتىنىن ايتۋدا.
«كليماتتىڭ وزگەرۋى ابستراكتىلى ۇعىم ەمەس، بۇل – ءبىزدىڭ ومىرىمىزگە اسەر ەتەتىن شىندىق. بۇل جاعداي ومىرگە قاۋىپ توندىرەدى»، - دەدى Greenpeace ۇيىمىنىڭ يسپانياداعى فيليالىنىڭ باسشىسى ەۆا سالدانيا.
اليكانتە ۋنيۆەرسيتەتىنىڭ عالىمى جانە يسپانياداعى كليماتتىڭ وزگەرۋىنە قاتىستى جاقىندا شىققان باياندامانىڭ تەڭ اۆتورى حورحە ولسينا ۆالەنسياداعى كۇشتى جاڭبىر مەن سۋ تاسقىنىنىڭ ءدال وسى سياقتى كورىنىستەردىڭ ءبىرى ەكەنىن اتاپ ءوتتى.
كليماتولوگتاردىڭ پىكىرىنشە، قازىرگى سۋ تاسقىنىنىنا كوپتەگەن فاكتورلاردىڭ جيىنتىعى سەبەپ بولىپ وتىر. الايدا جاھاندىق جىلىنۋ ناتيجەسىندە اتموسفەرانىڭ بىرتىندەپ جىلىنۋى مۇنداي تابيعي اپاتتاردىڭ بولۋ ىقتيمالدىعىن ارتتىرادى.
