ۇكىمەت وتىرىسىندا ەلدەگى سۋ تاسقىنىنىڭ سالدارىن جويۋ ماسەلەسى قارالدى، دەپ حابارلايدى "ادىرنا" ۇلتتىق پورتالى.
قر پرەمەر-ءمينيسترى ولجاس بەكتەنوۆتىڭ توراعالىعىمەن وتكەن ماجىلىستە ۆيتسە-پرەمەر قانات بوزىمباەۆ زالالدى وتەۋ الگوريتمىنە سايكەس وڭىرلەردە اتقارىلىپ جاتقان ءىس-شارالار تۋرالى باياندادى.
وتىرىستاعى مالىمەتكە سۇيەنسەك، 28 مامىرعا دەيىن رەسپۋبليكا بويىنشا 30 مىڭنان استام وتباسى 100 اەك مولشەرىندە بىرجولعى تولەم العان. سۋ تاسىعان ايماقتاردا 15 مىڭنان استام ءۇي مەن ساياجاي قۇرىلىستارى تەكسەرىلىپ، 11 134-ءى بويىنشا باعالاۋ جۇرگىزىلدى.
ۆيتسە-پرەمەر باتىس قازاقستان وبلىسىندا سۋ باسقان 4 مىڭ ءۇيدىڭ 2 176-ءى (54%) تەكسەرىلىپ، 770 ۇيگە باعالاۋ جۇرگىزىلگەنىن، اقتوبە وبلىسىندا 3 679 ءۇي تەكسەرىلىپ (73%), 1673 ءۇي باعالانعانىن مالىمدەدى. ال اتىراۋ، اقمولا، قوستاناي جانە سولتۇستىك قازاقستان وبلىستارىنىڭ اكىمدىكتەرى تاسقىننان زاقىمدانعان ۇيلەردى تەكسەرۋ جانە باعالاۋ جۇمىستارىن اياقتاعان. جالپى ەلىمىز بويىنشا 9 مىڭنان استام ءۇي قالپىنا كەلتىرىلۋگە بولاتىن قۇرىلىس قاتارىنا جاتادى. 4 315-ءى اپاتتى جاعدايدا دەپ تانىلىپتى.
بيىل وڭىرلەردە 1 847 ءۇي مەن پاتەردىڭ قۇرىلىسى باستالسا، قايتالاما نارىقتان 3 417 تۇرعىن ءۇي ساتىپ الۋ جوسپارلانىپ وتىر.
«اكىمدىكتەرگە ونەركاسىپ مينيسترلىگىمەن بىرگە تۇرعىنداردىڭ باسپانالارى مەن مۇلىكتەرىنە كەلتىرىلگەن زالالدى باعالاۋ جۇمىستارىن وسى اپتانىڭ سوڭىنا دەيىن اياقتاۋدى تاپسىرامىن. ازاماتتارىمىزدىڭ قيىن جاعدايىنا تۇسىنىستىكپەن جانە جان-جاقتى مۇقيات قاراڭىزدار. جۇمىستاردى كەشىكتىرمەي، بارىنشا تەزدەتۋ كەرەك. قانات الدابەرگەنۇلى، قاتاڭ باقىلاۋدا ۇستاڭىز»، — دەدى ۇكىمەت باسشىسى ولجاس بەكتەنوۆ.
