الەۋمەتتىك جەلىدە قالىڭ مالدى تالقىلاعان ايەلدىڭ ءسوزى پىكىرتالاس تۋدىردى، دەپ حابارلايدى “ادىرنا” ۇلتتىق پورتالى.
گۇلجان ەسىمدى تىكتوك قولدانۋشىسى قازاق قىزدارىنىڭ قالىڭمالىن 10 ملن تەڭگەگە كوتەرۋ كەرەك دەپ سانايتىنىن ايتتى. ونىڭ سوزىنشە، قىزداردىڭ قۇنى Toyota Camry كولىگىنەن دە ءتۇسىپ كەتكەن.
“قازاقتارعا قالىڭمالدىڭ باعاسىن 10 ميلليونعا كوتەرۋ كەرەك. نەگە دەيسىز عوي؟ سەبەبى قازىر قازاق قىزدارىنىڭ قۇنى «كامريدەن» دە ءتۇسىپ كەتتى. 1-1,5 ملن بەرىپ قۇتىلا سالادى. مەن وعان وتە قارسىمىن. بۇل جەردە ساۋدالاسىپ نەمەسە قىزدى ساتىپ جاتقان جوقپىن. بۇل جەردە قازاق قىزىنىڭ، ءوزىمىزدىڭ سالت-ءداستۇرىمىزدىڭ قۇندىلىعىن قايتادان جاڭعىرتىپ، كوتەرۋ كەرەك دەپ ويلايمىن”، - دەيدى بەلسەندى.
ايەل ادام قالىڭمالدىڭ از بولۋى اجىراسۋدىڭ بەلەڭ الۋىنا سەبەپشى بولىپ جاتقانىن ايتادى.
“مىسالعا، تۇرىكتەردە قىز الۋ ءۇشىن پالەنبەي كەلى التىن بەرەدى. بىراق ول جاقتا اجىراسۋ دەگەن جوق. ال ءبىز بۇكىل دۇنيەجۇزى بويىنشا اجىراسۋ جاعىنان شامامەن ءبىرىنشى ورىندى الىپ تۇر ەكەنبىز. سەبەبى وسىنداي قۇنسىزدانۋ كەسىرىنەن سونداي دۇنيەلەر بولادى. ەگەر دە ءبىز ءبىر قىزدى الۋ ءۇشىن 10 ملن بەرەتىن بولساق، ەكى جاقتىڭ دا ءبىر-بىرىنە دەگەن قارىم-قاتىناسى باسقاشا، قىز بالانىڭ الدىندا جىگىتتىڭ دەڭگەيى، ابىرويى جوعارى بولادى”، - دەيدى ول.
الايدا جەلى قولدانۋشىلارىنىڭ كەيبىرى پىكىرمەن كەلىسپەيتىنىن ايتتى.
“قىز اجىراسامىن دەسە قالىڭ مال العانى ەسىنەن شىعىپ كەتەدى”، “سوندا نە وزگەرەدى؟”، “قالىڭسىز-اق باقىتتى بولىپ جاتقاندار كوپ”، “سول 1 ميلليوننىڭ ءوزىن كرەديتكە الاتىندار بار”، “قازىر قىزدار قالىڭ مالدان بولەك قىمبات ماحر سۇرايدى” دەپ جارىسا جازۋدا. ال ەندىگى ءبىرى “قالىڭ مالعا دۇنيە الادى، ول جىگىتكە بارادى”، “بەرسىن، دۇرىس”، “ول ءبىزدىڭ ءداستۇر، قانشا بەرسە دە جاراسادى”، “قىزدىڭ قۇنىن كوتەرۋ كەرەك، ورىندى” دەگەن پىكىر قالدىرىپ جاتىر.
