اقتاۋدا مەكتەپ كۇزەتشىسى بالا زورلاماق بولدى دەگەن كۇدىككە ءىلىندى، دەپ "ادىرنا" ۇلتتىق پورتالى Lada.kz باسىلىمىنا سىلتەمە جاساپ حابارلايدى.
قالاداعى 10 مەكتەپتىڭ كۇزەتشىسىنەن مەكتەپ اتا-انالارى كۇدىكتەنۋدە.
سەبەبى اتا-انالار اراسىندا اۋديوحابارلاما تاراتىلعان. وندا دەمالىس كۇندەرى مەكتەپتىڭ اۋلاسىندا كامەلەتكە تولماعان قىزداردىڭ ويناپ جۇرگەنى ايتىلعان. حابارلاما ءماتىنى بويىنشا ويىن بالاسىن مەكتەپ كۇزەتشىسى پودەزگە شاقىرعان. سودان كەيىن ول قىزدى كۇزەت ۇستەلىنىڭ ارتىنا اپارىپ، وعان تيىسە باستاعاندا بالا قاشىپ قۇتىلىپتى.
"بۇل سۇمدىق ءبىزدىڭ مەكتەپتە بولعان. 52-53 جاستاعى ەر ادام مەكتەپتىڭ كىرە بەرىسىندە وتىرعان. قىزدى كۇزەت بولمەسىنە كىرگىزگەن. بالانىڭ قالاي قۇتىلعانى بەلگىسىز. كامەرا تۇرسا دا وسىلاي جاساعان. قىزعا ءتيسىپ، زورلاماق بولعان”، – دەلىنگەن اقپاراتتا.
بۇل فاكتىنى مەكتەپتىڭ ءوزى راستاپ وتىر. زارداپ شەككەن قىزدىڭ اناسى پوليتسياعا ارىز تۇسىرگەن.
مەكتەپ مالىمەتىنشە جاعا ۇستاتارلىق جاعداي 12 مامىر كۇنى بولعان. قازىر كۇزەتشى قاماۋعا الىندى.
"بۇل فاكتى بويىنشا قىلمىستىق ءىس قوزعالدى، باسقا اقپارات تەرگەۋ مۇددەسى ءۇشىن جاريالانبايدى", – دەلىنگەن وبلىستىق پد حابارلاماسىندا.
