تۇركىستان وبلىسىندا بويجەتكەننىڭ ءولى دەنەسى جىگىتىنىڭ كولىگىنەن تابىلدى، دەپ حابارلايدى "ادىرنا" ۇلتتىق پورتالى.
سايرام اۋدانى اقسۋكەنت اۋىلىندا 19 جاستاعى بويجەتكەن جۇمباق جاعدايدا كوز جۇمدى. قايعىلى وقيعا 30 ماۋسىم كۇنى بولعان.
اۋدان دۇكەندەرىنىڭ بىرىندە ساتۋشى بولىپ جۇمىس ىستەيتىن قىز كەشكىسىن ۇيىنە ورالماعان. كۋاگەرلەر قىزدىڭ جۇمىسىنان شىققان سوڭ جىگىتى كۇتىپ العانىن ايتادى.
ديلمۋرا ەرگينوۆا ۇيىنە سول كۇيى جەتە الماعان.
قىزىنا الاڭداعان اتا-انا بويجەتكەننىڭ مۇنداي ادەتى بولماعانىن ايتادى. جىگىتتىڭ وتباسىنا حابارلاسقان قىزدىڭ تۋىستارى "ۇلىنىڭ ۇيدە ۇيىقتاپ جاتقانىن ايتىپ، داۋرىقپاعانىن" ايتادى.
قايعىلى وقيعا بولعان كۇنى جىگىتتىڭ اتا-اناسى تويدا بولعان ەكەن.
"بىزگە تەك ءتۇن ىشىندە حابارلادى. قىزىمىز سول ۇيدەگى گاراج ىشىندەگى كولىكتەن ءولى كۇيىندە وتىر ەكەن”،– دەيدى مارقۇمنىڭ تۋعان اپكەسى.
اكەسى سول كۇنى قىزىنا قوڭىراۋ شالىپ، بىردە-ءبىر جاۋاپ الماعانىن ايتادى.
“قىزىمدا ۇيالى تەلەفونىن الماي قويۋ، حابارلاماعا جاۋاپ بەرمەۋ دەگەن ادەت ەشقاشان بولماعان. سودان سەكەم الدىق. 6 ساعات بويى سمارتفونىنا حابارلاستىق. ەكى نومىرىنە دە قوڭىراۋ بارىپ تۇردى. بىراق تۇتقانى المايدى. سوڭىندا كورشى اۋىلداعى ۇيدەن تابىلعانىن حابارلادى. بارساق، ەسىك الدىندا پوليتسيا دا، جەدەل جاردەم دە تۇر ەكەن. ال قىزىم قايتىس بولىپتى. ول مەنىڭ كەنجەتايىم ەدى. ءبىر رەت تە قارسى سويلەپ، ۇرىسقان ەمەسپىن”،– دەيدى مارقۇمنىڭ اكەسى دانيار قۇرباناليەۆ.
قىزدىڭ ءمايىتىن جۋعا كىرگەندەر بويجەتكەننىڭ دەنەسىندە زورلىقتىڭ ىزدەرى بولعانىن ايتادى.
“مەن ءمايىتتى جۋعا كىردىم. كۋاگەرمىن. اۋزىنا قان تولىپ قالعان ەكەن. ماڭدايى دا، بەتى دە ءىسىپ كەتكەن. جامباسىندا ءتىستىڭ ءىزى تۇر. قولى دا، مۇرنى دا سىنعان. ءسىڭلىمىز ارىن ساقتاۋ ءۇشىن جانتالاسقان سياقتى”، – دەيدى مارقۇمنىڭ اپكەسى مالاحات قۇرباناليەۆا.
الايدا ساراپتاما ناتيجەسىندە قىز ءيىس ءتيىپ جان تاپسىرعان دەلىنگەن. ستۋدەنت قىزدىڭ ءولىمى جۇمباق كۇيىندە قالعان. كۇدىكتى رەتىندە قىزدىڭ كورشى اۋىلدا تۇراتىن جىگىتى ۇستالعان.
عاشىقتار ءبىر-بىرىمەن ءبىر جىل بويى ءسوز بايلاسىپ جۇرگەن. ءتىپتى جىگىت قىزعا ۇيلەنۋدى دە جوسپارلاعان كورىنەدى.
