Áleýmettik jelide qalyń maldy talqylaǵan áıeldiń sózi pikirtalas týdyrdy, dep habarlaıdy “Adyrna” ulttyq portaly.
Gúljan esimdi TikTok qoldanýshysy qazaq qyzdarynyń qalyńmalyn 10 mln teńgege kóterý kerek dep sanaıtynyn aıtty. Onyń sózinshe, qyzdardyń quny Toyota Camry kóliginen de túsip ketken.
“Qazaqtarǵa qalyńmaldyń baǵasyn 10 mıllıonǵa kóterý kerek. Nege deısiz ǵoı? Sebebi qazir qazaq qyzdarynyń quny «Kamrıden» de túsip ketti. 1-1,5 mln berip qutyla salady. Men oǵan óte qarsymyn. Bul jerde saýdalasyp nemese qyzdy satyp jatqan joqpyn. Bul jerde qazaq qyzynyń, ózimizdiń salt-dástúrimizdiń qundylyǵyn qaıtadan jańǵyrtyp, kóterý kerek dep oılaımyn”, - deıdi belsendi.
Áıel adam qalyńmaldyń az bolýy ajyrasýdyń beleń alýyna sebepshi bolyp jatqanyn aıtady.
“Mysalǵa, túrikterde qyz alý úshin pálenbeı keli altyn beredi. Biraq ol jaqta ajyrasý degen joq. Al biz búkil dúnıejúzi boıynsha ajyrasý jaǵynan shamamen birinshi oryndy alyp tur ekenbiz. Sebebi osyndaı qunsyzdaný kesirinen sondaı dúnıeler bolady. Eger de biz bir qyzdy alý úshin 10 mln beretin bolsaq, eki jaqtyń da bir-birine degen qarym-qatynasy basqasha, qyz balanyń aldynda jigittiń deńgeıi, abyroıy joǵary bolady”, - deıdi ol.
Alaıda jeli qoldanýshylarynyń keıbiri pikirmen kelispeıtinin aıtty.
“Qyz ajyrasamyn dese qalyń mal alǵany esinen shyǵyp ketedi”, “sonda ne ózgeredi?”, “qalyńsyz-aq baqytty bolyp jatqandar kóp”, “sol 1 mıllıonnyń ózin kredıtke alatyndar bar”, “qazir qyzdar qalyń maldan bólek qymbat mahr suraıdy” dep jarysa jazýda. Al endigi biri “qalyń malǵa dúnıe alady, ol jigitke barady”, “bersin, durys”, “ol bizdiń dástúr, qansha berse de jarasady”, “qyzdyń qunyn kóterý kerek, oryndy” degen pikir qaldyryp jatyr.
