جەلىدە ايەل ادامنىڭ بالالارىمەن دالادا قالعانى تۋرالى اقپارات تارادى، دەپ حابارلايدى “ادىرنا” ۇلتتىق پورتالى.
بۇل اقپاراتتى قۇقىق قورعاۋشى، "قورعاۋ-استانا" ايەلدەر مەن بالالاردى قولداۋ ورتالىعىنىڭ باسشىسى اننا رىل بولىسكەن.
“تاڭەرتەڭ ماعان داۋىسى قارلىققان ەر ادام تەلەفون سوعىپ، بۇل ۇيسىزدەرگە ارنالعان ورتالىق پا دەپ سۇرادى. العاشىندا ول وزىنە ورىن ىزدەپ ءجۇر ەكەن دەپ ويلادىم. سوسىن، بۇل زورلىق-زومبىلىق قۇربانى بولعان ايەلدەر مەن بالالارعا ارنالعان ورتالىق دەدىم. ول: ء“يا، ماعان ءدال وسى ورتالىق قاجەت” دەدى. ول تۇندە بالالارىمەن كوشەدە وتىرعان ايەلدى كەزدەستىرگەنىن ايتتى. ەر ادامنىڭ ءوزى وتباسىمەن 1 بولمەلى پاتەردى جالداپ تۇرادى ەكەن. ولارعا جانى اشىپ، مەشىتكە جەتكىزىپتى. ول جەر جابىق بولعان سوڭ، ءبىزدىڭ ورتالىققا حابارلاسۋدى شەشىپتى”، – دەيدى ايەل.
اننا رىل ايەلدىڭ قانداي جاعدايعا تاپ بولعانىن ايتتى.
“ايەل جەسىر قالعان. تۇركىستان وبلىسىنان كەلگەن، جاردەماقى الادى. پاتەرگە تولەيتىن اقشاسى بولماعان سوڭ، شىعارىپ جىبەرگەن ەكەن. ارينە، بۇل ءبىزدىڭ ساناتىمىزعا كىرمەيدى. دەگەنمەن ءبىز ولاردى ءبىر اپتا بويى پانالاتتىق. ايەل جاردەماقى الا سالىسىمەن بولمەنى جالعا الاتىن بولادى. بۇل – قيىن ومىرلىك جاعداي. دەگەنمەن بۇل ساناتتا جۇمىس ىستەيتىن ورتالىقتار جوقتىڭ قاسى”، – دەدى اننا رىل.
