Jelide áıel adamnyń balalarymen dalada qalǵany týraly aqparat tarady, dep habarlaıdy “Adyrna” ulttyq portaly.
Bul aqparatty quqyq qorǵaýshy, "Qorǵaý-Astana" áıelder men balalardy qoldaý ortalyǵynyń basshysy Anna Ryl bólisken.
“Tańerteń maǵan daýysy qarlyqqan er adam telefon soǵyp, bul úısizderge arnalǵan ortalyq pa dep surady. Alǵashynda ol ózine oryn izdep júr eken dep oıladym. Sosyn, bul zorlyq-zombylyq qurbany bolǵan áıelder men balalarǵa arnalǵan ortalyq dedim. Ol: “ıá, maǵan dál osy ortalyq qajet” dedi. Ol túnde balalarymen kóshede otyrǵan áıeldi kezdestirgenin aıtty. Er adamnyń ózi otbasymen 1 bólmeli páterdi jaldap turady eken. Olarǵa jany ashyp, meshitke jetkizipti. Ol jer jabyq bolǵan soń, bizdiń ortalyqqa habarlasýdy sheshipti”, – deıdi áıel.
Anna Ryl áıeldiń qandaı jaǵdaıǵa tap bolǵanyn aıtty.
“Áıel jesir qalǵan. Túrkistan oblysynan kelgen, járdemaqy alady. Páterge tóleıtin aqshasy bolmaǵan soń, shyǵaryp jibergen eken. Árıne, bul bizdiń sanatymyzǵa kirmeıdi. Degenmen biz olardy bir apta boıy panalattyq. Áıel járdemaqy ala salysymen bólmeni jalǵa alatyn bolady. Bul – qıyn ómirlik jaǵdaı. Degenmen bul sanatta jumys isteıtin ortalyqtar joqtyń qasy”, – dedi Anna Ryl.
