تاجىكستاندا ايەلدەرگە تار، تىم اشىق ءتۇستى، قارا نەمەسە اشىق كيىم كيۋگە قاتىستى بىرنەشە شەكتەۋلەر ەنگىزىلدى، دەپ حابارلايدى "ادىرنا" ۇلتتىق پورتالى.
عۇلامالار كەڭەسى ۇلتتىق كيىمگە قاتىستى ارنايى ءپاتۋا شىعاردى. وندا تاجىكتەردىڭ ۇلتتىق كيىمدەرى "حانافي ءمازھابى تالاپتارىنا تولىق سايكەس كەلەدى" دەلىنگەن. سوندىقتان ەل تۇرعىندارىنا "بەلگىلى ءبىر ماقساتپەن ناسيحاتتالعان مادەنيەت پەن دىنگە جات" كيىمدەردى كيۋدەن باس تارتۋعا كەڭەس بەرىلەتىنى ەسكەرتىلدى.
"يسلام دىنىندە كيىم كيۋدىڭ ءوز ەرەجەلەرى بار. بىراق ورنەك پەن تۇسكە ەشقانداي شەكتەۋ قويىلماعان. سوندىقتان دىنىمىزدە ۇلتتىق كيىم كيۋگە رۇقسات ەتىلگەن. الايدا ۇلتتىق ەرەكشەلىكتەرىمىز بەن گەوگرافيالىق جاعدايىمىزعا ساي كەلمەيتىندىكتەن، ايەلدەرگە نيكاب كيۋ ۇسىنىلمايدى. بۇل دىنىمىزدە دە پارىز ەمەس. سونداي-اق جابىسىپ تۇراتىن كيىم كيۋدەن اۋلاق بولىڭىز. قۇرمەتتى انالار مەن اپكەلەر، ۇلتتىق مادەنيەتكە تاعزىم ەتىپ، ۇلتتىق ناقىشتاعى كيىمدەردى دىني نورمالارعا ساي، "ايەل-انا" يماندىلىعىنا، سونداي-اق يسلام ەتيكاسىنىڭ نورمالارىنا ساي كيىڭىزدەر", – دەلىنگەن ءپاتۋادا.
ال ءپاتۋادا ەرلەر كيىمىنە قاتىستى “ەرلەردىڭ دەنەسى كىندىكتەن تىزەگە دەيىن جابىق بولۋى كەرەك" دەلىنگەن.
عۇلامالاردىڭ شىعارعان ءپاتۋاسى 5 تارماقتان تۇرادى.
"ۇلتتىق كيىم كيۋدى ساقتاۋ – مادەنيەتتىڭ ءبىر بولىگى رەتىندە ۇلتتى تانىتۋدىڭ جانە اتا-بابا ءدىنىن نىعايتۋدىڭ ماڭىزدى قۇرالى. سونداي-اق ۇلتتىق مەملەكەتتىلىكتى نىعايتۋدىڭ، بەيبىتشىلىك پەن تۇراقتىلىقتىڭ كەپىلى", – دەلىنگەن.
سونداي-اق، تاجىكستان پرەزيدەنتى ناۋرىز ايىنداعى جيىندا ايەلدەردىڭ ورامال تاعۋىن "بوتەن مادەنيەتكە ەلىكتەۋ" دەگەن بولاتىن.
ال 2024 جىلدىڭ ماۋسىمىندا تاجىكستاندا "ۇلتتىق مادەنيەتكە جات" كيىمگە تىيىم سالىنعان. زاڭ جوباسىن پرەزيدەنت ەمومالي راحموننىڭ ءوزى ۇسىنعان.
جاڭا زاڭدا اشىق ەۋروپالىق كيىمدەر مەن تىم تومەن مويىن سىزىعى بار كويلەكتەر، سانىنە قاراي ادەيى جىرتىلعان شالبارلاردى كيۋگە تىيىم سالادى دەلىنگەن.
