حالىقارالىق قىلمىستىق سوتتىڭ (حقس) سوتقا دەيىنگى پالاتاسى تاجىكستان بيلىگىنەن رەسەي پرەزيدەنتى ۆلاديمير ءپۋتيندى قاماۋعا الىپ، سوتقا تاپسىرۋدان باس تارتۋىنا بايلانىستى رەسمي تۇسىنىكتەمە بەرۋدى تالاپ ەتتى، دەپ حابارلايدى "ادىرن" ءتىلشىسى ازاتتىق راديوسىنا سىلتەمە جاساپ.
اتالعان تالاپ حقس تاراپىنان وتكەن جىلدىڭ 5 قاراشاسىندا جولدانعانىمەن، بۇل اقپارات ەندى عانا بەلگىلى بولدى. سوتتىڭ مالىمەتىنشە، ۆلاديمير پۋتين 2025 جىلدىڭ قازان ايىندا تاجىكستانعا رەسمي ساپارمەن بارعان، الايدا دۋشانبە ونى قاماۋعا الۋ جونىندەگى مىندەتتەمەنى ورىنداماعان.
حقس ەسكە سالعانداي، رەسەي پرەزيدەنتىنە قاتىستى قاماۋعا الۋ وردەرى 2023 جىلعى 17 ناۋرىزدا ۋكرايناداعى اسكەري قىلمىستارعا بايلانىستى بەرىلگەن. سول جىلدىڭ ءساۋىر ايىندا سوت حاتشىلىعى ريم ستاتۋتىنا قاتىسۋشى بارلىق مەملەكەتكە، سونىڭ ىشىندە تاجىكستانعا دا، ءپۋتيندى قاماۋعا الۋ قاجەتتىگى تۋرالى رەسمي سۇراۋ جولداعان. قۇجاتتا تاجىكستان بۇل سۇراۋدى 2023 جىلدىڭ مامىرىندا العانىن راستاعان. دەگەنمەن، 2025 جىلعى 25 قىركۇيەكتە ونى ورىنداۋ مۇمكىن ەمەس ەكەنىن حابارلاعانى كورسەتىلگەن.
تاجىكستان بيلىگى ءوز ۇستانىمىن رەسەيدىڭ ريم ستاتۋتىنا قاتىسۋشى ەمەس ەكەنىمەن جانە ماسكەۋمەن جاسالعان ەكىجاقتى كەلىسىمدەردە جوعارى لاۋازىمدى تۇلعالاردىڭ يممۋنيتەتى قاراستىرىلعانىمەن تۇسىندىرگەن. سونىمەن قاتار دۋشانبە بۇل شەشىمىن حقس-پەن ىنتىماقتاستىقتان باس تارتۋ دەپ سانامايتىنىن مالىمدەگەن.
ال حالىقارالىق قىلمىستىق سوت ءوز كەزەگىندە لاۋازىمدى تۇلعالاردىڭ، سونىڭ ىشىندە ءۇشىنشى ەلدەردىڭ مەملەكەت باسشىلارىنىڭ جەكە يممۋنيتەتى سوت ءىسىن جۇرگىزۋگە كەدەرگى بولا المايتىنىن جانە ول ءۇشىن ارنايى يممۋنيتەتتەن باس تارتۋ تالاپ ەتىلمەيتىنىن اتاپ ءوتتى.
قازىرگى ۋاقىتتا حقس سوتقا دەيىنگى پالاتاسى تاجىكستاننىڭ سوتپەن ىنتىماقتاستىق جاسامادى دەپ تانۋ ماسەلەسىن جانە بۇل جاعدايدى سوتقا مۇشە مەملەكەتتەر اسسامبلەياسىنىڭ قاراۋىنا بەرۋ مۇمكىندىگىن قاراستىرىپ جاتىر.
