30 ءساۋىر كۇنى رەسەي تاراپىنىڭ وتىنىشىمەن تاجىكستان سىرتقى ىستەر ءمينيسترى سيروجيددين مۋحريددين رەسەيلىك ارىپتەسى سەرگەي لاۆروۆپەن تەلەفون ارقىلى سويلەسىپ، ماسكەۋدەگى تاجىكستان ازاماتتارىن تەكسەرۋ جايىن تالقىلادى، دەپ حابارلايدى “ادىرنا” ۇلتتىق پورتالى تاجىكستان سىرتقى ىستەر مينيسترلىگىنە سىلتەپ.
مالىمەتكە قاراعاندا، سىرتقى ىستەر ۆەدومستۆولارىنىڭ باسشىلارى رەسەي بيلىگىنىڭ قاتاڭ شارالارى ناتيجەسىندە رەسەي اۋماعىندا ورنالاسقان تاجىكستان ازاماتتارىنىڭ قيىن جاعدايعا تاپ بولعانىن تالقىلادى.
رەسەي سىرتقى ىستەر ءمينيسترى سەرگەي لاۆروۆ بۇل ماسەلەگە بايلانىستى تاجىك تاراپىنىڭ رەاكتسياسىن تۇسىنەتىنىن ايتتى.
مينيستر مۋحريددين تاجىكستان ازاماتتارىنا مۇنداي تەرىس كوزقاراس پەن ولاردىڭ قۇقىقتارى مەن بوستاندىقتارىنىڭ جاپپاي بۇزىلۋى ەكىجاقتى قارىم-قاتىناس قاعيداتتارىنا سايكەس كەلمەيتىنىن باسا ايتتى. وسى تۇرعىدا اڭگىمەلەسۋشىنىڭ نازارى رەسەيلىك تاراپتىڭ نەگىزگى ەكىجاقتى جانە كوپجاقتى قۇقىقتىق اكتىلەردىڭ، اتاپ ايتقاندا تاجىكستان رەسپۋبليكاسى مەن رەسەي فەدەراتسياسى اراسىنداعى دوستىق، ىنتىماقتاستىق جانە ءوزارا كومەك تۋرالى شارتتىڭ ەرەجەلەرىن ساقتاۋ قاجەتتىلىگىنە اۋدارىلدى.
لاۆروۆتىڭ «قابىلدانعان شارالار بەلگىلى ءبىر ۇلتقا نەمەسە دىنگە قارسى ەمەس» دەگەن مالىمدەمەسى اياسىندا مۋحريددين بۇل تەزيس ناقتى جاعدايمەن ۇيلەسپەيتىنىن جانە كەلەڭسىز ارەكەتتەر تەك تاجىكستان ازاماتتارىنا قاتىستى ەكەنىن اتاپ ءوتتى.
اڭگىمەلەسۋشىلەر تاراپتاردىڭ ستراتەگيالىق سەرىكتەستىك پەن وداقتاستىق قاعيداتتارىنا ادالدىعىن ساقتاۋ قاجەتتىگى تۋرالى ءبىراۋىزدان پىكىر ءبىلدىردى.
وسى مالىمەتتى رەسەي جاعى بىلاي حابارلادى. رەسەي سىرتقى ىستەر مينيسترلىگىنىڭ حابارلاۋىنشا، «تاجىكستان تاراپىنا رەسەي فەدەراتسياسىنىڭ زاڭناماسىنا سايكەس لاڭكەستىكتىڭ الدىن الۋ بويىنشا رەسەيلىك قىزمەتتەردىڭ قابىلداپ جاتقان شارالارى تۋرالى قوسىمشا تولىق تۇسىندىرمەلەر بەرىلگەن».
لاۆروۆ رەسەيگە كەلگەن شەتەل ازاماتتارىن مۇقيات تەكسەرۋدىڭ باستى سەبەبى 22 ناۋرىزدا ماسكەۋ تۇبىندەگى Crocus City Hall كونتسەرت زالىندا بولعان تەراكت ءىسى ەكەنىن اتاپ ءوتتى. مينيستر قابىلدانىپ جاتقان شارالاردىڭ ۋاقىتشا ەكەنىنە ەرەكشە توقتالىپ، ولاردىڭ بەلگىلى ءبىر ۇلتقا نەمەسە دىنگە قارسى ەمەستىگىن ايتتى. باقىلاۋ بەكەتتەرىندەگى جاعداي بىرتىندەپ قالىپقا كەلۋدە.
«تاراپتار رەسەي-تاجىكستان اراسىنداعى تۇسىنىسپەۋشىلىكتەن كەيىن ستراتەگيالىق سەرىكتەستىك پەن وداقتاستىق قارىم-قاتىناستارىن سىيلاۋ، ولاردىڭ وڭ ديناميكاسىن ساقتاۋ جانە نىعايتۋ قاجەتتىلىگى تۋرالى ءبىراۋىزدان پىكىر ءبىلدىردى»، - دەپ حابارلادى رەسەي سىرتقى ىستەر مينيسترلىگى.
تاجىكستان سىرتقى ىستەر مينيسترلىگىنىڭ حابارلاۋىنشا، سوڭعى ۋاقىتتا جۇزدەگەن تاجىك ازاماتى باقىلاۋ-وتكىزۋ بەكەتتەرى مەن ماسكەۋ اۋەجايلارىندا تۇرىپ قالىپ، رەسەي اۋماعىنا كىرگىزىلمەي جاتىر. ولاردىڭ كەيبىرى بىرنەشە ساعات كۇتكەننەن كەيىن ءوتىپ كەتىپ جاتسا، ال باسقالارى جەر اۋدارىپ كەتۋدە.
ەسكە سالا كەتەيىك، بۇعان دەيىن تاجىكستاننىڭ سىرتقى ىستەر مينيسترلىگى رەسەيدىڭ رەسپۋبليكاداعى ەلشىسىن شاقىرتىپ، رەسەي اۋماعىندا تاجىكستان ازاماتتارىنىڭ قۇقىقتارىنىڭ بۇزىلۋىنا بايلانىستى نارازىلىق نوتاسى تابىس ەتىلگەنىن جازعان بولاتىنبىز.
