Tájikstanda áıelderge tar, tym ashyq tústi, qara nemese ashyq kıim kııýge qatysty birneshe shekteýler engizildi, dep habarlaıdy "Adyrna" ulttyq portaly.
Ǵulamalar keńesi ulttyq kıimge qatysty arnaıy pátýa shyǵardy. Onda tájikterdiń ulttyq kıimderi "hanafı mázhaby talaptaryna tolyq sáıkes keledi" delingen. Sondyqtan el turǵyndaryna "belgili bir maqsatpen nasıhattalǵan mádenıet pen dinge jat" kıimderdi kııýden bas tartýǵa keńes beriletini eskertildi.
"Islam dininde kıim kııýdiń óz erejeleri bar. Biraq órnek pen túske eshqandaı shekteý qoıylmaǵan. Sondyqtan dinimizde ulttyq kıim kııýge ruqsat etilgen. Alaıda ulttyq erekshelikterimiz ben geografııalyq jaǵdaıymyzǵa saı kelmeıtindikten, áıelderge nıkab kııý usynylmaıdy. Bul dinimizde de paryz emes. Sondaı-aq jabysyp turatyn kıim kııýden aýlaq bolyńyz. Qurmetti analar men ápkeler, ulttyq mádenıetke taǵzym etip, ulttyq naqyshtaǵy kıimderdi dinı normalarǵa saı, "áıel-ana" ımandylyǵyna, sondaı-aq ıslam etıkasynyń normalaryna saı kıińizder", – delingen pátýada.
Al pátýada erler kıimine qatysty “erlerdiń denesi kindikten tizege deıin jabyq bolýy kerek" delingen.
Ǵulamalardyń shyǵarǵan pátýasy 5 tarmaqtan turady.
"Ulttyq kıim kııýdi saqtaý – mádenıettiń bir bóligi retinde ultty tanytýdyń jáne ata-baba dinin nyǵaıtýdyń mańyzdy quraly. Sondaı-aq ulttyq memlekettilikti nyǵaıtýdyń, beıbitshilik pen turaqtylyqtyń kepili", – delingen.
Sondaı-aq, Tájikstan prezıdenti naýryz aıyndaǵy jıynda áıelderdiń oramal taǵýyn "bóten mádenıetke elikteý" degen bolatyn.
Al 2024 jyldyń maýsymynda Tájikstanda "ulttyq mádenıetke jat" kıimge tyıym salynǵan. Zań jobasyn prezıdent Emomalı Rahmonnyń ózi usynǵan.
Jańa zańda ashyq eýropalyq kıimder men tym tómen moıyn syzyǵy bar kóılekter, sánine qaraı ádeıi jyrtylǵan shalbarlardy kııýge tyıym salady delingen.
