سەيسەنبى، 9 شىلدەدە بۇۇ قاۋىپسىزدىك كەڭەسىنىڭ شۇعىل وتىرىسىنا قاتىسۋشىلاردىڭ كوپشىلىگى رەسەيدىڭ كيەۆتەگى بالالار اۋرۋحاناسىنا جاساعان زىمىراندىق شابۋىلىن قاتاڭ ايىپتادى. سونداي-اق، بۇل شابۋىل ءۇشىن جاۋاپكەرشىلىكتى ۋكرايناعا اۋدارۋعا تىرىسقان ماسكەۋدى سىنعا الدى، دەپ حابارلايدى "ادىرنا" ۇلتتىق پورتالى.
"اۋرۋحاناعا قاساقانا شابۋىل جاساۋ اسكەري قىلمىس بولىپ تابىلادى جانە كىنالىلەر جاۋاپقا تارتىلۋى كەرەك. بۇل وقيعالار ۋكراينانىڭ دەنساۋلىق ساقتاۋ سالاسىنا جانە باسقا دا ازاماتتىق ينفراقۇرىلىمعا زيانىن تيگىزەتىن "جۇيەلى شابۋىلداردىڭ" اسا الاڭداتارلىق جايتتاردىڭ بولىگى بولىپ تابىلادى", - دەدى بۇۇ-نىڭ گۋمانيتارلىق ماسەلەلەر جونىندەگى باس حاتشىسىنىڭ مىندەتىن اتقارۋشى دجويس مسۋيا.
بۇۇ ەلشىسى رەسەيدىڭ جاساعان ارەكەتى جان تۇرشىكتىرەتىنىن جانە كەڭەس جيىنىڭ تىكەلەي وسى وقيعاعا قاتىستى بولىپ جاتقانىن اتادى.
«ءبىز بۇگىن وسىندا وتىرمىز، ويتكەنى رەسەي، قاۋىپسىزدىك كەڭەسىنىڭ تۇراقتى مۇشەسى، سونداي-اق قاۋىپسىزدىك كەڭەسىنىڭ قازىرگى پرەزيدەنتى بالالار اۋرۋحاناسىنا شابۋىل جاسادى جانە مەن مۇنى ايتقان سايىن دەنەم تۇرشىگەدى»، - دەدى اقش-تىڭ بۇۇ-داعى ەلشىسى ليندا توماس - گرينفيلد.
بريتاندىق باربارا ۆۋدۆورد رەسەيدىڭ شابۋىلدارى «قاۋىپسىزدىك كەڭەسى ءۇشىن ماسقارا جاعداي» دەپ قوستى. فرانتسۋز وكىلى وحماتدەت اۋرۋحاناسىنا جاسالعان شابۋىلدى «اسكەري قىلمىستار تىزىمىندەگى تاعى ءبىر جازبا» دەپ اتاپ، وسى ءۇشىن رەسەي جاۋاپقا تارتىلۋى ءتيىس ەكەنىن ايتتى.
ال قىتايدىڭ بۇۇ جانىنداعى تۇراقتى وكىلىنىڭ ورىنباسارى گەن شۋان ماسكەۋدى تىكەلەي ايىپتاعان جوق.
"وكىنىشكە قاراي، شايقاس سوڭعى ۋاقىتتا باسەڭدەپ جاتقان جوق، كەرىسىنشە وقتىن-وقتىن كۇشەيىپ، كوپ شىعىنعا ۇشىراپ، قاتىگەزدىككە ۇلاسىپ بارادى. قىتاي بۇل ءۇشىن قاتتى الاڭداۋلى", - دەدى گەن.
دەسە دە، رەسەي فەدەراتسياسىنىڭ بۇۇ جانىنداعى تۇراقتى وكىلى ۆاسيلي نەبەنزيا «رەسەي ۋكرايناداعى ازاماتتىق نىساندارعا شابۋىل جاسامايدى» دەپ اقتالۋعا تىرىستى. ونىڭ ايتۋىنشا، كيەۆكە جاسالعان شابۋىلدىڭ نەگىزگى نىساناسى ارتيوم اتىنداعى كيەۆ زاۋىتى بولعان، ال وحماتدەت اۋرۋحاناسى ۋكرايندىق اۋە قورعانىسىنىڭ زىمىرانىمەن اتىلعان. الايدا، رەسەيلىك وكىل نەبەنزيا بۇل نۇسقاعا ەشقانداي دالەل كەلتىرمەدى.
ۋكراينانىڭ بۇۇ جانىنداعى تۇراقتى وكىلى سەرگەي كيسليتسا كەزدەسۋگە قاتىسۋشىلارعا زىمىراننىڭ اۋرۋحاناعا قاراي ۇشىپ بارا جاتقانىن جانە ونىڭ تراەكتورياسىن كورسەتەتىن فوتوسۋرەتتەردى كورسەتتى.
