قازاقستاننىڭ ەكس-پرەزيدەنتى نۇرسۇلتان نازارباەۆتىڭ قىزى دينارا قۇلىباەۆا مەن كۇيەۋبالاسى، ميللياردەر تيمۋر قۇلىباەۆ التىن بانكتى ساتىپ الدى. بۇل اقپاراتتى قارجى نارىعىن رەتتەۋ جانە دامىتۋ اگەنتتىگى راستادى، دەپ حابارلايدى “ادىرنا” ۇلتتىق پورتالى.
قارجى نارىعىن رەتتەۋ جانە دامىتۋ اگەنتتىگىنىڭ باسقارماسى 7 ماۋسىمدا بىرقاتار قاۋلى قابىلداعان.
ونىڭ ءبىرى تيمۋر اسقارۇلى قۇلىباەۆقا «Altyn Bank» اكتسيونەرلىك قوعامىنىڭ (China Citic Bank Corporation Limited ەب) ءىرى قاتىسۋشىسى مارتەبەسىن (جاناما) يەلەنۋگە كەلىسىم بەرۋ جونىندە، ال ەكىنشىسى دينارا نۇرسۇلتانقىزى قۇلىباەۆانىڭ «Altyn Bank» اكتسيونەرلىك قوعامىنىڭ (China Citic Bank Corporation Limited ەب) ءىرى قاتىسۋشىسى مارتەبەسىن (جاناما) يەلەنۋىنە كەلىسىم بەرەدى.
ءۇشىنشى قاۋلىدا «المەكس» حولدينگتىك توبى» اكتسيونەرلىك قوعامىنا «Altyn Bank» (China Citic Bank Corporation Limited ەب) اكتسيونەرلىك قوعامىنىڭ بانك حولدينگى (جاناما) مارتەبەسىن يەلەنۋىنە كەلىسىم بەرىلەتىنى كورسەتىلگەن.
وسىلايشا تيمۋر جانە دينارا قۇلىباەۆتار «Altyn Bank» اكتسيونەرلىك قوعامىن ساتىپ الدى.
