حالىق اراسىندا ۋتيل الىمىن جاقتايتىن پەتيتسيا جاريالاندى، دەپ حابارلايدى "ادىرنا" ۇلتتىق پورتالى kolesa.kz-كە سىلتەپ.
ۇندەۋ جاساپ، پەتيتسيا جاريالاعاندار ۇكىمەتتەن وتاندىق وندىرۋشىلەردى قولداۋدى سۇراۋدا. 25 مامىر كۇنى «حالىق تابىسىن ارتتىرۋ! ونەركاسىپتى دامىتۋ!» اتتى پەتيتسيا Epetition. kz پورتالىنا شىعىپ، ءۇش كۇندە 10 مىڭنان استام قول جيناعان.
ۇندەۋ اۆتورلارى بيلىككە «سۇر يمپورتقا توسقاۋىل قويۋدى كۇشەيتىپ، وتاندىق ءوندىرىستى قولداۋ شارالارىنىڭ تيىمدىلىگىن ارتتىرۋعا، جەرگىلىكتى ءوندىرىستى دامىتۋعا باعىتتالعان باستامالاردى قولداۋعا، وسى سالاعا ينۆەستيتسيا تارتۋعا جانە ىنتالاندىرۋعا، وتاندىق كاسىپورىنداردىڭ وسۋىنە قولايلى جاعداي جاساۋعا» شاقىرىپ، سۇراۋ سالعان.
بۇل ۇندەۋ ۋتيل الىمى مەن باستاپقى تىركەۋدى تولەمەۋ تۋرالى پەتيتسيا 50 مىڭنان استام قول جيناعان سوڭ پايدا بولدى.
"ەشكىم بىرەۋدىڭ جەكە مۇددەسىنە بولا ەكونوميكالىق تاۋەلسىزدىگىنەن باس تارتپايدى. اقشا ەلدە قالۋعا ءتيىس!" — دەپ مالىمدەدى پەتيتسيا اۆتورلارى. ءۋتيلدى جاقتايتىن پەتيتسيا ونى الىپ تاستاۋ پەتيتسياسىنان كەيىن پايدا بولعان.
ايتا كەتەيىك، ۋتيل الىمعا قارسى پەتيتسيا 50 مىڭعا جۋىق قول جيناعان. ونەركاسىپ جانە قۇرىلىس ءمينيسترى قانات شارلاپاەۆ ۋتيل الىمىنا قارسى پەتيتسيا قالاي قارالاتىنىن مالىمدەدى.
"كوميسسيا قۇرىلادى، ول بىرقاتار ءوندىرۋشى زاۋىتتارعا بارۋى دا مۇمكىن. سودان كەيىن كوميسسيا قورىتىندىسىن جاريالايمىز، ودان سوڭ قوعامدىق تىڭدالىم وتەدى. بارلىق پروتسەسكە شامامەن 40 كۇندەي كەتەدى. 24 مامىردان 5 شىلدەگە دەيىن قول قويىلعان پەتيتسيا بويىنشا زاڭعا سايكەس پىكىر بەرۋىمىز قاجەت. ەگەر دە پەتيتسياعا بالاما جولدار بولسا، ولار دا قابىلدانىپ، مەملەكەت تيىسىنشە قارايتىن بولادى", - دەدى قانات شارلاپاەۆ.
