قىرعىزستانداعى قاقتىعىستان سوڭ بىرنەشە پاكىستاندىق شەكارادان زاڭسىز ءوتىپ كەتپەك بولعان، دەپ حابارلايدى "ادىرنا" ۇلتتىق پورتالى 24kg-عا سىلتەپ.
باسىلىمنىڭ بۇگىن جاريالاعان دەرەكتەرىندە حابارلانعانداي، «ۆاسيلەۆكا» شەكارا زاستاۆاسىنىڭ جاۋاپتى اۋماعىندا تۇنگى رەيد بارىسىندا قىرعىزستاننىڭ قازاقستانمەن مەملەكەتتىك شەكاراسىن زاڭسىز كەسىپ وتپەك بولعان پاكىستاننىڭ التى ازاماتى ۇستالعان.
مەملەكەتتىك شەكارانى زاڭسىز كەسىپ ءوتۋ ارەكەتىنە قاتىستى قىلمىستىق ءىس قوزعالدى. التى شەتەلدىك بىشكەك قالالىق ىشكى ىستەر باسقارماسىنىڭ ۋاقىتشا ۇستاۋ يزولياتورىنا قامالدى.
ايتا كەتەيىك، 17 مامىر كۇنى كەشكە بىشكەكتە شەتەلدىكتەرگە قارسى نارازىلىق باستالعان. ارتىنشا 19 مامىر كۇنى پاكىستان ءوز ستۋدەنتتەرىن ەلدەن الىپ كەتكەنى تۋرالى جازعان بولاتىنبىز.
