ءىرى ۇرىلاردىڭ كوكەسى مەن اتاسى جوعارى جاقتا ەمەس، تۇركىستان وبلىسىندا ەكەنىن ەل جاقسى بىلەدى. قۇدايدىڭ قۇتتى كۇنى «تۇركىستاندا ەدەن جۋشى بولىپ جۇمىسقا كىرۋ 800 مىڭ تەڭگەدەن باستالادى» ءام «اياعى اۋىر كەلىنشەكتەن امان-ەسەن بوسانۋ ءۇشىن قىرۋار قاراجات تالاپ ەتىپتى» دەگەندى ەستىپ-ەستىپ مەشەۋ كۇيگە تۇسكەنىمىز راس. ەندى مىنە، تاعى دا تۇركىستان قالاسى اكىمدىگىنىڭ «تۇرعىن ءۇي قاتىناستارى جانە تۇرعىن ءۇي ءبولىمى» مەملەكەتتىك مەكەمەسى «نۇرلى جەر» باعدارلاماسى اياسىندا وتكىزىپ جاتقان كونكۋرستارىنان دا ىلىك شىقتى.
بۇل كەشە، بۇگىن عانا جارق ەتىپ شىعا قالعان سىبايلاستىق سيندرومى ەمەس، جىلدارى بويى قاتقان قاسىرەتتىڭ ءبىر ۇشى. بۇل — مەملەكەتتىڭ 7.20.25 باعدارلاماسىن وڭ جامباسىنا يكەمدەگەن اكىمدىكتەردىڭ قويىرتپاعى.
شارت بويىنشا ولار ءۇيدىڭ شارشى مەترىن ەلدە جوق باعا 180-گە باعالاپ، ساعات ءتىلى تۇڭگى ون ەكىنى ۇرعاندا كونكۋرستى باستاپ كەتەدى. ءبىر قىزىعى، كونكۋرستىڭ تالاپتارى اسا قيىن ەمەس. باستى شارت: قولىڭداعى قۇجاتتاردى ءبىرىنشى بولىپ تىركەۋ. ياعني تولقۇجات، جۇمىس ورنىنان سوڭعى 6 ايلىق كورسەتكىش، جىلجىمايتىن مۇلىكتىڭ جوقتىعىن راستايتىن انىقتاما جانە كرەديتتىك تاريحتى مەجەگە ءبىرىنشى بولىپ ۇسىنا سالساڭ جەتىپ جاتىر. ايتپاقشى، تۇركىستان تۇرعىندارىنىڭ ايتۋىنشا، ەگەر تالاپقا ساي بولماساڭ، ەشتەڭە ەتپەيدى، باستىسى كوپتەۋ پارا بەر دە، شەكەسىنەن شەرتىپ ءجۇرىپ، قالاعان ءۇيىڭدى الا بەر. كونكۋرس ۋاقىتى 3 تاۋلىككە سوزىلعان. دەسە دە تۇنگى 00:00 بولماي جاتىپ، سايت ءمىز باقپاي قاتىپ قالادى. قانشا جەردەن جىلدامدىعى جوعارى كومپيۋتەرىڭ مەن عالامتورىڭ بولسا دا، قاتىپ قالعان سايتتى ىستەتە المايسىڭ. قىسقاسىن ايتقاندا، سەرۆەر ءبىر مەزەتتە ىستەن شىعادى. قاراپايىم بۇقارا ەسىكتەن ەڭتەلەپ كىرە الماي تۇرعان ساتتە، سەرۆەردى بۇعاتتاعاندار ءوز ادامدارىنىڭ قۇجاتتارىن تىركەپ الادى. ال سوسىن ۋاقىت 1-2-گە جاقىنداعاندا سايت قايتا جاندانىپ سالا بەرەدى. ماكسيمالدى جىلدامدىقپەن كومپيۋتەردەن كوز الماي وتىرساڭ دا بەس ءجۇزىنشى بولىپ تىركەلەسىڭ. قىسقاسى، كونكۋرسقا تۇسكەن ارى كەتسە توقسان ءۇيدى تەك تۇسىڭدە كورۋگە تۋرا كەلەدى. بۇل تۋرالى تۇركىستان تۇرعىنى اسقات كەڭەسۇلى ءبۇي دەيدى.
«كونكۋرسقا وسىمەن ءۇش رەت قاتىستىم. بىرىنشىسىندە تىركەلە المادىم. ەكىنشىسىندە ايەلىم 1125 بولىپ تىركەلدى. 1.30 ساعات وتىردىق، ۇشىنشىسىندە 1435 بوپ تىركەلدىم. كونكۋرستىڭ شارتتارى تۋرالى اشىق ەرەجە نە پروتسەسس تۋرالى اقپارات جوق. قۇجاتىمىزدىڭ دۇرىس نە بۇرىس ەكەندىگىن دە حابارلامايدى. قىسقاسى، اشىقتىق جوق، كۇدىك كەلەدى. بۇل سايت بازاسىمەن ەل بولىپ كۇرەسۋ كەرەك! ەگەر كوپ قولدانۋشىعا ءبىر ۋاقىتتا قىزمەت كورسەتە الماسا، وندا بازانى قولدانىستان الىپ تاستاۋ كەرەك نە بولماسا كەدەرگىلەردى شەشۋ كەرەك. مەنىڭشە، سايتتىڭ السىزدىگى «ءبىر كىسىلەرگە» ءتيىمدى. ويتكەنى ءار پاتەرگە قول جەتكىزۋگە كومەك بەرۋ قۇنى 500 مىڭ تەڭگە دەسەك، بۇل ءىستىڭ اينالاسىندا ءبىر ۆاگون اقشا اينالۋدا. ياعني وتكەن 3 قاراشادان 4 قاراشاعا قاراعان تۇندە بولعان 160 ءۇي ءۇشىن 80 ملن. قارجى اينالىپ تۇر دەگەن ءسوز»…
ال،
SHYNDYQ.KZ اقپاراتتىق پورتالىنىڭ باس رەداكتورى ايكا ايتاحانوۆ:
«سايتان العىر سايت. “7-20-25” باعدارلاماسىنىڭ دا شاپاعاتى تيمەدى-اۋ! و، باستا ء“ۇيسىز-كۇيسىز كۇن كەشكەندەرگە ارنالعان” دەپ جارنامالاپ ەدى… ءدال وسى باعدارلامادا ءۇش رەت باق سىناپ كوردىك. باسپانالى بولماق تۇگىلى، تىزىمگە ىلىنە المادىق. تانىستارىم ء“وز كۇشىڭمەن وتە المايسىڭ” دەپ ەدى. راس ەكەن! 500 مىڭ تەڭگەگە IT مامانىن جالداپ قانا باسپانالى بولۋعا بولادى ەكەن. مۇنى “ەستىمەدىم” دەمەڭىزدەر. ەكىنىڭ ءبىرى وسى اڭگىمەنى ايتىپ ءجۇر. انسار ۋسەرباەۆ مىرزا، ءسىز قالاي بۇل باعدارلامامەن باسپانالى بولدىڭىز؟ بولىسە وتىرىڭىز!» دەسە، تۇركىستان تۇرعىنى ناۋرىزباي اسقاروۆ: «سەگىز-اق رەت قاتىسىپ، ءۇي الا المادىم» دەپ وكىنىشىن ءبىلدىردى.
تۇركىستان تەلەارناسىنىڭ ءتىلشىسى رىسگۇل دوسجانوۆا دا ءوز فەيسبۋك پاراقشاسىندا 00:00-دە ءبىرىنشى تىركەلگەنگە ءۇي بەرەتىن بولسا، كونكۋرس نەگە 3 كۇنگە سوزىلاتىنىن تۇسىنبەي الەك.
«وسى ۋاقىتقا دەيىن قانشا داۋلى پوست وقىدىم، تالقىلاۋ تىڭدادىم. سوندا دا، تۇسىنبەيتىنىم: اقىرى، تۇنگى 12 دە كىم ءبىرىنشى تىركەلسە، سول ءۇي الاتىن بولسا، نەمەنەگە وعان ءوتىنىش بەرۋگە 3 كۇن ۋاقىت بەرەسىزدەر؟! كىم كىمدى الداپ ءجۇر؟! تۇنگى 00:00 بولماق تۇگىلى، 23:55 تەن باستاپ سايت اشىلمايدى عوي. ينتەرنەت بايلانىسى دەپ نەشە ورىندى اۋىستىرىپ تا كوردىك. جاي عانا ءسوزىم جوق. كەلەسى كونكۋرس بولعاندا بار عوي، كامەرانى قوسىپ قويماسام»، — دەيدى تەلەارنا ءتىلشىسى.
قىسقاسىن ايتقاندا، جاۋىردى جابا توقىساڭ دا، ارزان ءۇي قالتالىلاردىڭ قالتاسىندا كەتۋدە. وسى ورايدا ەگەر، سىبايلاس جەمقورلىعى اگەنتتىگىنىڭ ءوزى جەمقور بولماسا، بۇل ماسەلەنى نازارعا الىپ، شەشىمىن تابار دەگەن تالاپ-تىلەگىمىز بار.
