رەداكتسيامىزعا اسكەري بورىشىن وتەۋ بارىسىندا كوز جۇمىپ، ومىردەن قىرشىن كەتكەن جاس سارباز قالباي الىبەك سالاماتۇلىنىڭ جاقىندارىنان حات كەلىپ ءتۇستى.
حاتتىڭ سارىنى تومەندەگىدەي:
"ماڭعىستاۋ وبلىسى، اقشۇقىر اۋىلىنان بولامىن. مەن اسكەري بورىشىن وتەۋگە كەتىپ، 4 كۇننەن كەيىن قايتىس بولعان قالباي الىبەكتىڭ جەڭگەسىمىن. قازىر سوتتى توقتاتىپ، قايتادان تەرگەۋ ءۇشىن پروكاراتۋراعا جولداعانبىز. بىراق ادىلدىككە جەتۋ دەگەن وتە قيىن ەكەن. بالامىزدىڭ دەنەسىنىڭ 18 جەرىندە گەماتوما بولدى."
حات اۆتورى سوت ءىسىنىڭ قىزمەتىنە ءۋاج ايتادى. قىلمىستىڭ تولىق اشىلماي، تەرگەۋدىڭ ءجۇردىم-باردىم جۇرگىزىلگەنىنە شاعىمدانادى. شاعىم قر پرەزيدەنتى ق-ج. توقاەۆتىڭ اتىنا جازىلعان.
"قۇرمەتتى قازاقستان رەسپۋبليكاسىنىڭ پرەزيدەنتى قاسىمجومارت كەمەلۇلى توقاەۆ!
بيىلعى جىلدىڭ 22 ساۋىرىندە جامبىل وبلىسى، گۆاردەيسك قالاشىعى، 30212 اسكەري بولىمشەسىندە جاس سارباز قالباي الىبەك سالاماتۇلىنىڭ وتانىنا قىزمەت ەتۋگە كەتىپ، ءتورت كۇننەن كەيىن بەلگىسىز سەبەپتەرمەن ساپتا تۇرعان جەرىنەن قايتىس بولۋ وقيعاسى ورىن الدى. اتالعان وقيعا بويىنشا سول اسكەري ءبولىمىنىڭ جاس ساربازى ا.امانجۋلوۆقا قاتىستى قر قك-سىنىڭ 440 بابى 2 تارماعىمەن قىلمىستىق ءىس قوزعالدى.
قازىرگى كەزدە ا.امانجۋلوۆ قاماۋدا.
گۆاردەيسكي قالاشىعىنداعى سوتقا دەيىنگى اسكەري تەرگەۋ ءبولىمى باسشىسى م.ب.دجاناەۆىڭ باسشىلىعىمەن تەرگەۋ توبى قۇرىلىپ، قىلمىستىق ءىس ەكى ايدان استام ۋاقىت وتكەننەن سوڭ الماتى قالاسى بويىنشا اسكەري سوتىنىڭ وندىرىسىنە ءتۇستى.
اسكەري پروكۋراتۋرا تاراپىنانا جوعارىدا كورسەتىلگەن باپپەن ا.امانجۋلوۆقا قاتىستى ايىپ تاعىلىپ، سوت تەرگەۋى دە باستالدى. سوت تەرگەۋىندە 174 كۋاگەردىڭ 46-cىنان جاۋاپ الىندى. ونىڭ ىشىندە سول اسكەري ءبولىمنىڭ كومانديرلەرى، سەرجانتتار، اسكەري ءبولىم دارىگەرى، مەيىربيكە، جاس ساربازدار سۇرالدى. جاۋاپ الىنعان كۋاگەردىڭ تۇگەلى دەسەك ارتىق ايتىلماعانى بولار، جالعىز كۇدىكتى كۋروچكيننىڭ اماجۋلوۆ ۇردى دەپ كورسەتكەن جاۋاپتارى نەگىزىن تاپپادى.
قىلمىستىق ءىس ءۇستىرتىن جۇرگىزىلگەن. پروكۋراتۋرا تاراپىنان قانداي دا ءبىر اسكەري ءبولىم كومانديرلەرلەرىمەن، سەرجانتتارىنىڭ ءىس-اركەتتەرىن جاسىرۋ ماقساتىندا بولسا كەرەك، مۇلدەم ءىس وبەكتيۆتى قارالماعان. جاۋاپ الۋ حاتتامالارىندا كەتكەن كەمشىلىكتەر شاش ەتەكتەن. قىلمىستىق ءىس بويىنشا قايتىس بولعان جاس سارباز ا.قالبايدى ۇرىپ سوقتى دەگەن جەرىنە قاتىستى وقيعا ورنىنان «سيتۋاتسيوننىي» قاراۋ جاسالعان. ول جەردە بالا-باقشا بالاسىن الداعانداي جاساندى ءىس-ارەكەتتەر كورىنىپ تۇردى.
سوت وترىسىنا شاقىرتىلعان اسكەرى شەندىلەرمەن، جاس ساربازدار جانە كۋاگەر ۆ.كۋروچكين جاۋاپتارىندا بىرنەشە قاراما-قايشىلىقتار ورىن الدى. اسكەري 30212 اسكەري ءبولىمىنىڭ 220 دانا «بەينەتاسپالارىنىڭ» جۇمىس ىستەمەيتىندىگى انىقتالدى.
سوت تەرگەۋىندە جاۋاپ الىنعان ماڭعىستاۋ وبلىسى بويىنشا ساراپتاما ينستيتۋتىنىڭ «يزگۋماتسيا» جاساعان كوميسسيا ساراپشىلارى ا.احمەتوۆپەن ا.اميرشين، گيستولوگ ا.بەرديبەكوۆا وزدەرى تاراپىنان جاساعان ساراپتاما قورىتىندىلارىن راستادى. الايدا، مايىتكە العاشقى بولىپ ساراپتاما جاساعان جامبىل وبلىسى بويىنشا ساراپتاما ينستيتۋتىنىڭ ساراپشىسى ا.كيم ءوزى بەرگەن قورىتىندىعا تولىقتاي جاۋاپ بەرە الماي، ساراپتاما قورىتىندىسىن جارتىلاي قۋاتتادى.
سوت تەرگەۋىندە جاۋاپ الىنعان سەرجانت سوستاۆى وزدەرىنىڭ ەشنارسەدەن حابارسىز ەكەندىرىن ايتىپ، وقيعا بولعان كۇنى تاپجىلماي جۇمىس ورىندارىندا بولعاندارىن دالەلدەۋگە تىرىستى. الايدا، قورعاۋ تاراپى وعان سىن كوزبەن قارادى.
21.04.2022 جىلى كەشكە ساربازدار ۇيقىعا جاتقاننان كەيىن تاڭعى ساعات 5.00 شاماسىنا دەيىن مارقۇم ا.قالبايدىڭ تاياق جەگەنىن جوققا شىعارۋعا بولا ما؟
22.04.2022 جىلى تاڭعى ساپتا تۇرىپ قۇلاعان مارقۇم ا.قالبايدىڭ دەنەسىنەن ساراپشىلار 18 ءتۇرلى جاراقاتتىڭ بارىن جوققا شىعارمادى. "سوندا جالعىز سارباز ا.امانجۋلوۆتىڭ ۇرعان 6.7 سوققىسىنان ادام ءولدى مە؟" دەگەن سۇراققا وسى كۇنگە دەيىن ماردىمدى جاۋاپ الا المادىق.
جابىرلەنۋشى تاراپتىڭ اتىنان م.دجاۆگاشەۆ اتىنا ءوتىنىش-حاتتار جولداندى. ول جەردەگى جابىرلەنۋشى تاراپتىڭ ماقساتى ءىستىڭ اق-قاراسىن انىقتاۋدى جانە ءادىل قاراۋدى سۇراعان بولاتىن. الايدا، وعان نازار اۋدارعان باسشىلىق جوق.
گۆاردەيسكي ءبولىمى تەرگەۋ تاراپى باسشىسى ت.دجايكوۆ اسكەري بولىمشەسىندە جاس سارباز ءولىمى بولىپ جاتقاندا ەركىن ەڭبەك دەمالىسىنا كەتكەنى ازداي، ىشىمدىككە سىلقيا تويىپ الىپ، تەرگەۋگە تارتىلىپ، جاۋاپ الىنىپ جاتقان ساربازدارعا قوقاڭ لوقى كورسەتىپ، كەلگەندەرىنە بەس كۇن بولعان ساربازدارعا قىلمىستى مويىنداڭدار دەپ بالاعاتتاعانى سوت تەرگەۋىندە امانجۋلوۆقا ۇسىنعان فوتوتابليتسادا تانىلدى.
قازاقستان رەسپۋبليكاسى كونستيتۋتسياسىنىڭ 3 بابى،1,2 تارماعى بويىنشا مەملەكەتتىك بيلىكتىڭ بىردەن-ءبىر باستاۋى - حالىق دەلىنگەن.
قازاقستان رەسپۋبليكاسى ءوزىن دەموكراتيالىق، زايىرلى، قۇقىقتىق جانە الەۋمەتتىك مەملەكەت رەتىندە ورنىقتىردى، ونىڭ ەڭ قىمبات قازىناسى – ادام جانە ادامنىڭ ءومىرى، قۇقىقتارى مەن بوستاندىقتارى. ەشكىمدى ازاپتاۋعا، وعان زورلىق-زومبىلىق جاساۋعا، باسقاداي قاتىگەزدىك نەمەسە ادامدىق قادىر-قاسيەتىن قورلايتىنداي ءجابىر كورسەتۋگە نە جازالاۋعا بولمايدى دەلىنگەن.
كۋلماگامبەتوۆتەر وتباسىنا، تۋىستارىمەن اتا-اناسىنا قىرشىن، 18 جاسقا ەندى تولعان ازامات جىگىت بولعان بالاسىنىڭ جامبىل وبلىسى گۆاردەيسكي قالاشىعى وتار ەلدى مەكەنىندە 30212 اسكەري بولىمشەسىنە ءوز وتانىن قورعايمىن دەپ كەلگەن جەرىنەن باس اياعى ءتورت كۇن ىشىندە بەلگىسىز جۇمباق جاعدايدا قايتىس بولدى دەگەن سۋىق حابار بۇكىل ەلدى بەي-جاي قالدىرمادى.
بۇل جاس سارباز قالبايدىڭ ءولىمى نەگە ءتورت كۇن ىشىندە بولدى؟ وعان كىنالىلەر كىم؟ كىنالىلەر بولسا، نەگە تەرگەۋ تاراپىنان جازاعا تارتىلمادى، سوندا جازاسىن وتەۋگە اۋىر قىلمىستى ءبىر ساربىزدىڭ ارقالاپ كەتۋىنە نە سەبەپ دەگەن مىڭداعان سۇراققا جاۋاپ الۋ مۇمكىن بولمادى.
30212 اسكەري بولىمشە باسشىلارىنىڭ نەمقۇرايلى بولعاندىقتارىنان سارباز ءولىمى بولىپ وتىرعان جوقپا؟ الماتى گارنيزونى اسكەري سوتىنىڭ وندىرىسىندە قر قك-سىنىڭ 440 بابى 4 بولىگىمەن قارالىپ جاتقان ا.امانجۋلوۆقا قاتىستى قىلمىستىق ءىسىن جامبىل وبلىسى بويىنشا اسكەري پروكۋراتۋراسىنا قايتارىلدى. الايدا پروكۋراتۋرا سوت شەشىمىمەن كەلىسپەي اپەللياتسيالىق شاعىم ءتۇسىردى.
09.11.2022 جىلى استانا قالاسى بويىنشا جوعارعى سوتىندا قارالعان اپەللياتسيالىق شاعىم وزگەرسسىز قالدىرىلىپ، قىلمىستىق ءىس قايتا تەرگەۋگە گۆاردەيسكي كالاشىعى تەرگەۋىنە كايتا كايتارىلدى.
قۇرمەتتى پرەزيدەنت!
وسى جاس ساربازدىڭ ولىمىنە قاتىسى بار اسكەري شەندىلەردى جاۋاپقا تارتىپ، ءىستى وبەكتيۆتى تۇردە قاراپ ءادىل شەشىم شىعارۋ ءۇشىن ىقپال ەتۋىڭىزدى سۇرايمىز!جابىرلەنۋشى كۋلماگامبەتوۆ سالامات
"ادىرنا" ۇلتتىق پورتالى
