شىعىس قازاقستان وبلىسى گلۋبوكوە اۋدانىندا مەرزىمىندە تاپسىرىلماعان جانە ناتيجەسىز جوبالار كوبەيگەن. بۇعان دەيىن 2 ميلليارد تەڭگەگە تارتىلعان اۋىز سۋ قۇبىرىنىڭ دۇرىس جۇمىس ىستەمەي تۇرعانى جايلى ايتقان ەدىك. ەندى اۋدان ورتالىعىندا 4,5 ميلليارد تەڭگە تۇراتىن قازاندىق ءالى ىسكە قوسىلماي جاتىر، دەپ حابارلايدى “ادىرنا” ۇلتتىق پورتالى حابار 24 ارناسىنا سىلتەمە جاساپ.
جىلۋ ورتالىعىنىڭ قۇرىلىسى مەملەكەتتىك جانە جەكەمەنشىك ارىپتەستىك نەگىزىندە جۇرگىزىلۋى ءتيىس ەدى. بيۋدجەتتەن 1,5 ميلليارد تەڭگەدەن استام قاراجات ءبولىندى. الايدا شەتەلدىك ينۆەستور وكىلدەرى وزدەرى كەلىسكەن مەردىگەر كومپانيامەن مامىلەگە كەلە الار ەمەس. قازىر ەكى تاراپ ءوزارا سوتتاسىپ جاتىر. ال قۇرىلىس توقتاپ تۇر. كەنت تۇرعىندارى بولسا، قىسقا وتىن جيناپ، ەلەكتر جىلىتقىش قۇرالدارىن ساتىپ الىپ، بارىنشا قامدانىپ جاتىر.
«مەملەكەتتىك جەكەمەنشىك ارىپتەستىك بويىنشا سالىنعاندىقتان، مەملەكەت تاراپىنان ەشقانداي كەدەرگى بولىپ تۇرعان جوق.1 ميلليارد 689 ميلليون تەڭگەنىڭ جۇمىسى ورىندالدى. قازىر قۇرىلىس مونتاج شارۋالارى قالدى. جەكەمەنشىك شەتەلدىك ينۆەستور وزدەرى كەلىسكەن مەردىگەر كومپانيامەن ءوز ماسەلەلەرىن شەشە الماي جاتىر. ارالارىنداعى كرەديتورلىق قارىز 227 ميلليون تەڭگە»، - دەيدى گلۋبوكوە اۋدانى تۇكش ءبولىمى باسشىسىنىڭ مىندەتىن اتقارۋشى ەلدار ىدىرىشەۆ.
”ادىرنا” ۇلتتىق پورتالى
