وزبەكستان قاۋىپسىزدىك كەڭەسىنىڭ كەڭەيتىلگەن وتىرىسىندا پرەزيدەنت شاۆكات ميرزيوەۆ قازىرگى زامانعى سوعىس مەن قاتەرلەردىڭ وزگەرۋىنە بايلانىستى ەلدىڭ قورعانىس دوكتريناسى مەن ۇلتتىق قاۋىپسىزدىك تۇجىرىمداماسىن جاڭارتۋ قاجەتتىگىن مالىمدەدى، دەپ حابارلايدى "ادىرنا" پورتالى gazeta.uz سايتىنا سىلتەمە جاساپ.
مەملەكەت باسشىسى 2018 جىلى قابىلدانعان قولدانىستاعى قورعانىس دوكتريناسى مەن 1997 جىلعى ۇلتتىق قاۋىپسىزدىك تۇجىرىمداماسى جاڭا سىن-قاتەرلەرگە ءتيىمدى جاۋاپ بەرۋ ءۇشىن قايتا قاراۋدى قاجەت ەتەتىنىن اتاپ ءوتتى. ول جاڭا دوكترينا وزبەكستاننىڭ اسكەري بلوكتارعا قوسىلمايتىن بەيتاراپ مەملەكەت رەتىندەگى مارتەبەسىن ساقتاۋدى قامتاماسىز ەتىپ، سونداي-اق كوپجاقتى ديپلوماتياعا باسىمدىق بەرۋى ءتيىس ەكەنىن ايتتى.
«جاڭا قورعانىس دوكتريناسى ارميانى تەحنولوگيالىق تۇرعىدان جاڭارتۋدىڭ جانە وزىق اسكەري شەشىمدەردى ەنگىزۋدىڭ نەگىزى بولۋى كەرەك»، – دەپ قوستى پرەزيدەنت.
سونداي-اق ول جوعارى تەحنولوگيالارعا جانە اسكەري دەربەستىككە نەگىزدەلگەن ستراتەگيا ازىرلەۋدىڭ ماڭىزدىلىعىن اتاپ ءوتتى، بۇل وڭىرلىك تۇراقتىلىقتى قامتاماسىز ەتۋگە ىقپال ەتپەك.
ايتا كەتەيىك، ۇلتتىق قاۋىپسىزدىك تۇجىرىمداماسىنىڭ جاڭا رەداكتسياسىن ازىرلەۋ 2018 جىلعا جوسپارلانعان بولاتىن، الايدا بۇل قۇجات ءالى كۇنگە دەيىن قابىلدانعان جوق.
