الماتى حالىقارالىق اۋەجايىندا اۋا رايىنىڭ قولايسىزدىعىنا بايلانىستى بىرقاتار اۋە رەيستەرى كەيىنگە قالدىرىلدى، دەپ حابارلايدى "ادىرنا" ۇلتتىق پورتالى.
17 قاڭتاردا جوسپارلانعان كەيبىر رەيستەر كەشكى ۋاقىتقا اۋىستىرىلعان. اۋەجاي اكىمشىلىگىنىڭ مالىمەتىنشە، قاۋىپسىزدىكتى قامتاماسىز ەتۋ ماقساتىندا بارلىق قىزمەت كۇشەيتىلگەن رەجيمدە جۇمىس ىستەپ جاتىر.
«اۋەجايدىڭ بارلىق قىزمەتى كۇشەيتىلگەن رەجيمدە جۇمىس ىستەۋدە، كىدىرىستەردى بارىنشا ازايتۋ ءۇشىن ءتيىستى شارالار قابىلدانىپ جاتىر. جولاۋشىلار مەن ەكيپاج مۇشەلەرىنىڭ قاۋىپسىزدىگى – باستى باسىمدىعىمىز»، – دەلىنگەن رەسمي حابارلامادا.
اۋەجاي جولاۋشىلاردى رەيستەر كەستەسىندەگى ىقتيمال وزگەرىستەرگە تۇسىنىستىكپەن قاراۋعا شاقىردى. سونداي-اق جولاۋشىلارعا ءوز اۋە كومپانيالارىنان ۇشۋ ۋاقىتى تۋرالى الدىن الا ناقتىلاپ، alaport.com رەسمي سايتىن قاداعالاپ وتىرۋ ۇسىنىلدى.
