جاپونيانىڭ وساكا شىعاناعىندا ورنالاسقان كانساي حالىقارالىق اۋەجايى ينفراقۇرىلىمنىڭ سالماعىنا بايلانىستى سۋ باسۋ قاۋپىنە تاپ بولدى، دەپ حابارلايدى "ادىرنا" ۇلتتىق پورتالى The Daily Mail باسىلىمىنا سىلتەپ.
1994 جىلى 20 ميلليارد دوللار قارجىعا سالىنعان اۋەجاي جىل سايىن 30 ميلليوننان استام جولاۋشىعا قىزمەت كورسەتىپ كەلەدى. ول جاپونيانىڭ قۇرلىق بولىگىمەن 3,75 شاقىرىمدىق كوپىر ارقىلى بايلانىسادى. جوبالاۋشىلار جەر سىلكىنىسىنىڭ ىقتيمالدىعىن ەسكەرىپ، ۇشۋ-قونۋ جولاقتارىنا ارنايى اسفالتبەتون قوسپاسىن قولدانعان. بۇل قوسپا جولدىڭ سەرپىمدىلىگىن ارتتىرىپ، ونىڭ دەفورماتسياعا توزىمدىلىگىن قامتاماسىز ەتەدى.
الايدا قازىرگى ۋاقىتتا اۋەجايدىڭ باستى ماسەلەسى – ونىڭ ءوز سالماعى بولىپ وتىر. اۋەجاي تەڭىز تۇبىندە تۇنبا مەن بالشىق قاباتتارىندا ورنالاسقاندىقتان، ۋاقىت وتكەن سايىن قۇرىلىمعا تۇسەتىن قىسىم اسەرىنەن ونىڭ تومەندەۋى بايقالۋدا. باستاپقىدا ينجەنەرلەر اۋەجايدىڭ 50 جىل ىشىندە 8 مەترگە دەيىن تومەندەيتىنىن بولجاعان، الايدا بۇگىنگى تاڭدا ونىڭ دەڭگەيى 11,5 مەترگە تومەندەگەن. ەگەر بۇل ءۇردىس جالعاسا بەرسە، 2056 جىلعا قاراي اۋەجاي تولىعىمەن سۋ استىنا كەتۋى مۇمكىن.
كانساي اۋەجايى الەمدەگى ەڭ ۇزىن تەرمينال عيماراتىمەن تانىمال. ونىڭ ۇزىندىعى 1,7 شاقىرىمدى قۇرايدى. اۋەجايدىڭ ەرەكشە جۇك وڭدەۋ كورسەتكىشتەرىمەن دە داڭقى شىققان. قولدانىسقا بەرىلگەننەن بەرى جولاۋشىلاردىڭ ەشقانداي جۇكتەرى جوعالماعان.
