فرانتسيا پارلامەنتى ۆيتسە-سپيكەرلەرىنىڭ بىرى كلەمانس گەتتە اقش-تىڭ سىرتقى ساياساتىنا بايلانىستى ەلدىڭ ناتو-دان شىعۋ ماسەلەسىن تالقىلاۋعا شىعارۋدى جوسپارلاپ وتىرعانىن مالىمدەدى، دەپ حابارلايدى "ادىرنا" ۇلتتىق پورتالى ria-عا سىلتەپ.
ساياساتكەر ح الەۋمەتتىك جەلىسىندەگى پاراقشاسىندا اقش-تى بىرقاتار اۋىر ايىپتاۋلارمەن سىنعا الدى. ونىڭ جازۋىنشا، اقش «ۆەنەسۋەلادا مەملەكەت باسشىسىن ۇرلاپ اكەتتى»، سونداي-اق «پالەستيناداعى گەنوتسيدكە اسكەري قولداۋ كورسەتىپ وتىر».
سونىمەن قاتار گەتتە اقش-تىڭ گرەنلاندياعا قاتىستى دا قاۋىپ ءتوندىرىپ وتىرعانىن، ال دونالد ترامپتىڭ باسشىلىعىمەن «حالىقتاردى بومبالاپ، حالىقارالىق قۇقىقتى ورەسكەل بۇزىپ جاتقانىن» اتاپ ءوتتى.
«بۇگىندە فرانتسيانىڭ سولتۇستىك اتلانتيكالىق كەلىسىم ۇيىمىنا مۇشەلىگى بۇرىنعىدان دا وزەكتى ماسەلەگە اينالدى. بۇل – اقش باسقاراتىن جانە ونىڭ مۇددەسىنە قىزمەت ەتەتىن اسكەري اليانس. مەن ناتو-دان جوسپارلى تۇردە شىعۋ جونىندە، ەڭ الدىمەن ونىڭ ينتەگراتسيالانعان قولباسشىلىق قۇرىلىمىنان شىعۋدى كوزدەيتىن رەزوليۋتسيا ۇسىنامىن»، – دەدى كلەمانس گەتتە.
ايتا كەتەيىك، سوڭعى ۋاقىتتا ەۋروپادا اقش-تىڭ سىرتقى ساياساتى مەن ناتو-نىڭ رولىنە قاتىستى سىن كۇشەيىپ كەلەدى.
