يران بيلىگىنىڭ قاتاڭ كۇش قولدانۋىنا جانە ينتەرنەتتىڭ بۇعاتتالۋىنا قاراماستان، تەگەران مەن ەلدىڭ باسقا دا ءىرى قالالارىندا جاپپاي نارازىلىق اكتسيالارى ءوتتى، دەپ حابارلايدى "ادىرنا" ۇلتتىق پورتالى.
Reuters مالىمەتىنشە، قازا تاپقاندار سانى كەمىندە 60 ادامعا جەتكەن.
تەگەران قالاسىنىڭ مەرى زاكانيدىڭ ايتۋىنشا، 9 قاڭتارعا قاراعان ءتۇنى وتكەن نارازىلىقتار كەزىندە 50-دەن استام بانك پەن بىرنەشە مەملەكەتتىك مەكەمە ورتەلگەن. سونداي-اق، ءورت سالدارىنان 30-دان اسا مەشىت جويىلعان.
يرانداعى ادام قۇقىقتارى ورتالىعىنىڭ حابارلاۋىنشا، تەگەران، مەشحەد جانە كارادج قالالارىنداعى اۋرۋحانالار جارالانعان نارازىلىققا قاتىسۋشىلارعا تولى. ال قۇقىق قورعاۋ اگەنتتىگىنىڭ دەرەگىنشە، قاقتىعىستار كەزىندە كەمىندە 62 ادام قازا تاپقان. ولاردىڭ 14-ءى قاۋىپسىزدىك كۇشتەرىنىڭ قىزمەتكەرلەرى، 48-ءى – نارازىلىق بىلدىرۋشىلەر. سونىمەن قاتار، 2300-گە جۋىق ادام ۇستالعان.
يراننىڭ رۋحاني كوشباسشىسى اياتوللا ءالي حامەنەي جاپپاي نارازىلىقتاردى قاتاڭ سىنعا الدى. ول اكتسياعا شىققانداردى «ارانداتۋشىلار» دەپ اتاپ، ولاردىڭ ەلگە زيان كەلتىرىپ جاتقانىن ايتتى.
