17 قاڭتاردا يران يسلام رەسپۋبليكاسىنىڭ پرەزيدەنتى ماسۋد پەزەشكيان رەسەيگە رەسمي ساپارمەن كەلدى. كەلىسسوزدەر بارىسىندا رەسەي پرەزيدەنتى ۆلاديمير پۋتين مەن يران باسشىسى ەكىجاقتى ىنتىماقتاستىقتى دامىتۋ مەن وڭىرلىك ماسەلەلەردى تالقىلاپ، ستراتەگيالىق ارىپتەستىك تۋرالى ماڭىزدى كەلىسىمگە قول قويدى، دەپ حابارلايدى "ادىرنا" ۇلتتىق پورتالى.
كەلىسىم قورعانىس، لاڭكەستىكپەن كۇرەس، ەنەرگەتيكا، قارجى، كولىك، ونەركاسىپ، اۋىل شارۋاشىلىعى، مادەنيەت، عىلىم جانە تەحنولوگيا سياقتى سالالاردى قامتيدى. بۇل كەلىسىمنىڭ ماقساتى – ەكى ەل اراسىنداعى ۇزاق مەرزىمدى جانە جان-جاقتى ىنتىماقتاستىقتى نىعايتۋ.
ساپار بارىسىندا يران پرەزيدەنتى رەسەي پرەمەر-ءمينيسترى ميحايل ميشۋستينمەن دە كەزدەسۋ وتكىزدى. تاراپتار ساۋدا-ەكونوميكالىق بايلانىستاردى دامىتۋ، گۋمانيتارلىق جانە كولىك-لوگيستيكالىق جوبالاردى جۇزەگە اسىرۋ ماسەلەلەرىن تالقىلادى.
ساراپشىلار بۇل كەلىسىمدى ەكى ەل اراسىنداعى قارىم-قاتىناستى جاڭا دەڭگەيگە كوتەرەتىن ماڭىزدى قادام رەتىندە باعالاۋدا. تاياۋ شىعىستى زەرتتەۋ ورتالىعىنىڭ ساراپشىسى فارحاد يبراگيموۆ بۇل قۇجات رەسەي-يران بايلانىستارىن ستراتەگيالىق سەرىكتەستىك دەڭگەيىندە بەكىتەتىنىن اتاپ ءوتتى.
سونىمەن قاتار، بۇل كەلىسىمنىڭ يران ەكونوميكاسىنىڭ وسۋىنە، ەۋرازيالىق ەكونوميكالىق وداق (ەاەو) ەلدەرىمەن ىنتىماقتاستىقتى كەڭەيتۋگە جانە "سولتۇستىك-وڭتۇستىك" كولىك ءدالىزىنىڭ دامۋىنا ىقپال ەتۋى كۇتىلۋدە.
