كۋبا پرەزيدەنتى ميگەل دياس-كانەل ۆەنەسۋەلاعا جاسالعان اقش شابۋىلى كەزىندە 32 كۋبا ازاماتىنىڭ قازا تابۋىنا بايلانىستى ەلدە ۇلتتىق ازا تۇتۋ كۇنىن جاريالادى، دەپ حابارلايدى «ادىرنا» ءتىلشىسى.
«2026 جىلعى 5 قاڭتار تاڭعى ساعات 6:00-دەن 6 قاڭتار تۇنگى 00:00-گە دەيىن ەكى كۇندىك ۇلتتىق ازا تۇتۋ كۇنى جاريالانسىن»، – دەلىنگەن جارلىقتا.
قۇجاتقا سايكەس، ازا تۇتۋ كۇندەرى كۋبانىڭ مەملەكەتتىك تۋى بيلىك ورگاندارى مەن اسكەري مەكەمەلەردىڭ عيماراتتارىندا تومەن تۇسىرىلەدى، بارلىق مەرەكەلىك جانە ويىن-ساۋىق ءىس-شارالارى توقتاتىلادى.
كۋبا پرەزيدەنتى قۇجاتتا كۋبالىق اسكەري قىزمەتشىلەر ءوز بورىشىن ابىرويمەن اتقارعانىن، ولاردىڭ تىكەلەي قاقتىعىستاردا نەمەسە اسكەري نىساندارعا جاسالعان اۋە سوققىلارى سالدارىنان قازا تاپقانىن اتاپ ءوتتى.
ەسكە سالايىق، 3 قاڭتارعا قاراعان ءتۇنى ۆەنەسۋەلادا جارىلىستار بولعان ەدى. كەيىن اق ءۇي باسشىسى ترامپ اقش اۋقىمدى سوققىلار جاساعانىن، ال مادۋرو جۇبايى سيليا فلورەسپەن بىرگە ۇستالىپ، ەلدەن شىعارىلعانىن حابارلاعان. ايتۋىنشا، مادۋرو مەن فلورەس «ەسىرتكى تەرروريزمىنە» قاتىسى بار دەگەن ايىپپەن جانە اقش-قا قاۋىپ ءتوندىردى دەگەن ۋاجبەن سوت الدىندا جاۋاپ بەرەدى.
وسىعان بايلانىستى كاراكاس اقش وپەراتسياسىنا وراي بىرىككەن ۇلتتار ۇيىمى شۇعىل وتىرىسىن شاقىرۋدى تالاپ ەتتى. ال ۆەنەسۋەلانىڭ جوعارعى سوتى مەملەكەت باسشىسىنىڭ مىندەتىن ۋاقىتشا ۆيتسە-پرەزيدەنت دەلسي رودريگەسكە جۇكتەدى.
