Sahara sanduǧaşy — Sauyq Jaqanova

Bügın — Qazaqstannyŋ eŋbek sıŋırgen ärtısı, radio älemınıŋ maitalmany, talai şäkırtke ülgı bolǧan Sauyq Jaqanovanyŋ tuǧan künı. Ol jarty ǧasyr boiy efirde halyqqa taza, mänerlı, äserlı dauysymen qyzmet ettı. Sauyq Jaqanova 1945 jyly 11 aqpanda Qaraǧandy oblysy, Jaŋaarqa audany, Erkındık auylynda düniege kelgen. Bügınde 80 jasqa toldy. 1966 jyly Qazaq memlekettık universitetınıŋ filologiia fakultetın tämamdap, sol jyly Qazaq radiosynyŋ diktory retınde qyzmetke qabyldandy. Sauyq Jaqanova radionyŋ däuırlegen kezeŋınde tyŋdarmanǧa är jaŋalyqty aiqyn diksiiamen, erekşe mänermen jetkızıp otyrdy. Onyŋ dauysyn halyq tūnyq būlaqtyŋ syldyryna, samal jeldıŋ äuezıne teŋedı. Dauys yrǧaǧy, söz saptauy, orfoepiiany saqtauy – onyŋ käsıbi deŋgeiınıŋ joǧary bolǧanyn körsettı. «Radio – tyŋdauşyǧa dybystap oqu, söileu arqyly jetetın aqparat qūraly. Sondyqtan diktordyŋ dauysy maŋyzdy. Būryn diktorlardy diksiiasyna, tıl tazalyǧyna, yrǧaq ekpınıne qarap taŋdaityn», – deidı ol. Sauyq Jaqanova tek radio diktory ǧana emes, ǧalym, ūstaz, zertteuşı retınde de ülken eŋbek ettı. 1998 jyldan bastap T.Jürgenov atyndaǧy Qazaq Ūlttyq öner akademiiasynda sahnalyq söileu pänınen därıs berdı. 2000 jyldan berı äl-Farabi atyndaǧy Qazaq Ūlttyq universitetınıŋ jurnalistika fakultetınde därısker, dosent boldy. Şäkırtterıne söileu mädenietın üiretıp, radio men televidenie salasynda dūrys söileudıŋ maŋyzdylyǧyn tüsındırdı. Sondai-aq, «Söileu tehnikasy» (2002), «Jürgızuşınıŋ söileu mädenietı» (2004) kıtaptaryn jazyp, söileu önerın damytuǧa üles qosty. 1985 jyly «Qūrmet belgısı» ordenımen marapattaldy. 1995 jyly Qazaqstan Respublikasynyŋ Eŋbek sıŋırgen ärtısı ataǧyna ie boldy. Sauyq Jaqanovanyŋ erekşe dauysy Qazaq radiosynyŋ «Altyn qorynda» saqtauly. Onyŋ efirdegı eŋbegı, şäkırtterıne üiretken bılımı, eŋbegı – qazaq jurnalistikasy men mädenietınıŋ altyn qazynasy. Ol – Qazaq radiosynyŋ sanduǧaşy, tyŋdauşynyŋ jüregıne jol tapqan diktor.