Búgin — Qazaqstannyń eńbek sińirgen ártisi, radıo áleminiń maıtalmany, talaı shákirtke úlgi bolǵan Saýyq Jaqanovanyń týǵan kúni.
Ol jarty ǵasyr boıy efırde halyqqa taza, mánerli, áserli daýysymen qyzmet etti.
Saýyq Jaqanova 1945 jyly 11 aqpanda Qaraǵandy oblysy, Jańaarqa aýdany, Erkindik aýylynda dúnıege kelgen. Búginde 80 jasqa toldy. 1966 jyly Qazaq memlekettik ýnıversıtetiniń fılologııa fakýltetin támamdap, sol jyly Qazaq radıosynyń dıktory retinde qyzmetke qabyldandy.
Saýyq Jaqanova radıonyń dáýirlegen kezeńinde tyńdarmanǵa ár jańalyqty aıqyn dıkııamen, erekshe mánermen jetkizip otyrdy. Onyń daýysyn halyq tunyq bulaqtyń syldyryna, samal jeldiń áýezine teńedi. Daýys yrǵaǵy, sóz saptaýy, orfoepııany saqtaýy – onyń kásibı deńgeıiniń joǵary bolǵanyn kórsetti.
«Radıo – tyńdaýshyǵa dybystap oqý, sóıleý arqyly jetetin aqparat quraly. Sondyqtan dıktordyń daýysy mańyzdy. Buryn dıktorlardy dıkııasyna, til tazalyǵyna, yrǵaq ekpinine qarap tańdaıtyn», – deıdi ol.
Saýyq Jaqanova tek radıo dıktory ǵana emes, ǵalym, ustaz, zertteýshi retinde de úlken eńbek etti.
1998 jyldan bastap T.Júrgenov atyndaǵy Qazaq Ulttyq óner akademııasynda sahnalyq sóıleý páninen dáris berdi.
2000 jyldan beri ál-Farabı atyndaǵy Qazaq Ulttyq ýnıversıtetiniń jýrnalıstıka fakýltetinde dárisker, doent boldy.
Shákirtterine sóıleý mádenıetin úıretip, radıo men televıdenıe salasynda durys sóıleýdiń mańyzdylyǵyn túsindirdi.
Sondaı-aq, «Sóıleý tehnıkasy» (2002), «Júrgizýshiniń sóıleý mádenıeti» (2004) kitaptaryn jazyp, sóıleý ónerin damytýǵa úles qosty.
1985 jyly «Qurmet belgisi» ordenimen marapattaldy. 1995 jyly Qazaqstan Respýblıkasynyń Eńbek sińirgen ártisi ataǵyna ıe boldy.
Saýyq Jaqanovanyń erekshe daýysy Qazaq radıosynyń «Altyn qorynda» saqtaýly. Onyń efırdegi eńbegi, shákirtterine úıretken bilimi, eńbegi – qazaq jýrnalıstıkasy men mádenıetiniń altyn qazynasy.
Ol – Qazaq radıosynyń sandýǵashy, tyńdaýshynyń júregine jol tapqan dıktor.
