اباي اۋدانىنىڭ اكىمى بۇحارباي پارمانوۆ سەس ماماندارىمەن بىرگە قالانىڭ بىرقاتار بازارىن ارالاپ، ازىق-تۇلىك باعاسىن نەگىزسىز وسىرمەۋگە، كوۆيد ىندەتىنىڭ الدىن الۋعا جانە ەلدە ورىن العان احۋالعا بايلانىستى حالىق ىشىندە تۇسىندىرمە جۇمىستارىن جۇرگىزدى.
— ەلدە بولعان كۇردەلى جاعداي ەكونوميكاعا كەرى اسەرىن تيگىزدى. بىراق بۇل ازىق-تۇلىك باعاسىنىڭ نەگىزسىز وسۋىنە سەبەپ بولماۋ كەرەك. ويتكەنى قالادا ازىق-تۇلىك قورى جەتكىلىكتى. ەكىنشى ماسەلە، كوۆيد ىندەتى جىلدام تارالىپ جاتىر. سوندىقتان بازارلار سانيتارلىق تالاپتاردى قاتاڭ ساقتاۋى شارت. سودان كەيىن ادامداردى بىرلىككە، ىنتىماققا شاقىرۋ، مەملەكەتتىڭ باستى بايلىعى اۋىزبىرشىلىك ەكەنىن حالىققا ءتۇسىندىرۋ بويىنشا جۇمىستاردى ۇدايى قولعا الاتىن بولامىز، - دەدى اۋدان اكىمى ب.پارمانوۆ.
جۇمىسشى توپ «اۆتونۇر» بازارىندا بولىپ، سانيتارلىق جاعدايدى باقىلاپ، ساتۋشىلاردى ساقتىق شارالارىن ساقتاۋعا شاقىردى.
— سوڭعى كۇندەرى كوۆيد جۇقتىرۋ دەرەگى قالادا ەداۋىر وسكەن. وسىعان بايلانىستى ادامدار گيگيەنا مەن سانيتارلىق تالاپتى كۇشەيتۋلەرى قاجەت. اسىرەسە ساۋدا جانە قوعامدىق ورىندارعا كىرۋ تەك «Ashyq» باعدارلاماسىمەن جۇزەگە اسىرىلۋى ءتيىس. ساتۋشىلاردان بەتپەردە كيۋ جانە قولدى وڭدەيتىن سانيتايزەردىڭ بولۋى تالاپ ەتىلەدى. شىمكەنت قالاسىنىڭ مەملەكەتتىك باس سانيتارلىق دارىگەرى ءا.تولەباەۆتىڭ جاڭا قاۋلىسىنا سايكەس ءۇشىنشى مەگاپوليستە كوۆيد ىندەتىنە قارسى شارالاردى كۇشەيتۋ جۇمىستارى باستالدى. وعان سايكەس بارلىق بيزنەس نىساندارى «Ashyq» قوسىمشاسىنا تىركەلۋى قاجەت. سونىمەن بىرگە كوروناۆيرۋس دەرتىنە قارسى رەۆاكتسيناتسيا ءجۇرىپ جاتىر. وسىعان وراي ازاماتتاردى قوسىمشا ەكپە الۋعا شاقىرامىن، - دەدى سانيتارلىق-ەيدەميولوگيالىق باقىلاۋ باسقارماسىنىڭ ءبولىم باسشىسى ءشاربات ايبوتاەۆا.
«اباي اۋدانى شىمكەنتتىڭ ەكونوميكالىق بەلسەندى اكىمشىلىك-اۋماقتىق تەرريتورياسىنا جاتادى. اۋداندا باسقالارىمەن سالىستىرعاندا ەڭ كوپ ساۋدا ورىندارى شوعىرلانعان. بۇگىنگى تاڭدا اباي اۋدانىندا ءىرىلى-ۇساقتى 13 بازار بار. مەگاپوليس تۇرعىندارىنىڭ 32 پايىزىن وسى اۋداننىڭ حالقى قۇرايدى. سوندىقتان باعا تۇراقتىلىعىن قامتاماسىز ەتۋ، ىندەتتىڭ ءورشىپ كەتپەۋىن قاداعالاۋ جانە قوعامدىق تىنىشتىقتى ساقتاۋ جالپى قالا ءۇشىن وتە ماڭىزدى» دەيدى ب.پارمانوۆ.
ءوز كەزەگىندە قىزىلجار ەلدى مەكەنىنىڭ باستاۋىش ارداگەرلەر ۇيىمىنىڭ توراعاسى باستارحان بايجانوۆ قوعامدىق ءتارتىپ، ادامداردىڭ زاڭدى بۇزباۋى بارىنەن ماڭىزدى ەكەنىن ايتتى. ەلدە ورىن العان وقيعادان كەيىن ارداگەرلەر ۇيىمىنىڭ مۇشەلەرى جاستاردىڭ تاربيەلىك جۇمىسىنا، ىزگىلىككە، باۋىرماشىلدىققا ۇندەيتىن ۇگىت-ناسيحات ءىس-شارالارىنا شىنداپ كىرىسپەك.
اكىمدىك پەن سەس ماماندارى «جابىق بازاردىڭ» جاعدايىمەن دە تانىستى. بەتپەردە كيۋ، ساتىپ الۋشىلاردان دا سونى تالاپ ەتۋ بويىنشا بازار قىزمەتكەرلەرىنە ەسكەرتۋلەر جاسالدى.
باقىلاۋ جۇمىستارىنىڭ ناتيجەسىندە بازارلاردا ازىق-تۇلىكتىڭ باعاسى تۇراقتى ەكەنىنە، سانيتارلىق تالاپتار مۇمكىندىگىنشە ساقتالعانىنا ماماندار كوز جەتكىزىپ قايتتى. دەگەنمەن سەس وكىلدەرى ساۋدا ورىندارىنىڭ باسشىلارىنان سانيتارلىق قاتاڭ شارالاردى بوساڭسىتىپ الماۋىن سۇرايدى.
ءانۋار جۇماشباەۆ
فوتو سەرىك قوساەۆ
