قر پرەمەر-ءمينيسترى ءاليحان سمايىلوۆ جاڭارتىلعان قۇرامدا ۇكىمەتتىڭ العاشقى وتىرىسىن وتكىزدى، دەپ حابارلايدى «ادىرنا» ءتىلشىسى.
جاڭادان تاعايىندالعان ۇلتتىق ەكونوميكا ءمينيسترى الىبەك قۋانتىروۆ، يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ، ەنەرگەتيكا ءمينيسترى بولات اقشولاقوۆ، ادىلەت ءمينيسترى قانات مۋسين، دەنساۋلىق ساقتاۋ ءمينيسترى اجار عينيات، اقپارات جانە قوعامدىق دامۋ ءمينيسترى اسقار ۋماروۆ مەملەكەتتىك قىزمەتشى انتىن بەردى.
«بۇكىل ەلىمىزدىڭ باسىنا اۋىرتپالىق ءتۇسىپ تۇرعان قازىرگىدەي كۇردەلى كەزەڭدە ءبىز مەملەكەت باسشىسىنىڭ زور سەنىمىن اقتاۋىمىز كەرەك. بىزدەر – ۇكىمەتتىڭ جاڭا قۇرامى، حالىقتىڭ ءومىر ساپاسىن جاقسارتۋعا، ەكونوميكانىڭ ءوسىمىن ساقتاۋعا جانە پاندەميانى ەڭسەرۋگە، لاڭكەستەر مەن بۇزاقى-توناۋشىلار كەلتىرگەن وراسان شىعىنداردى قالپىنا كەلتىرۋگە، ەلىمىزدى جاپپاي داعدارىستان شىعارۋعا باعىتتالعان پرەزيدەنت تاپسىرمالارىن ورىنداۋ ءۇشىن بار كۇش-جىگەرىمىزدى اياماي جۇمىس ىستەۋىمىز قاجەت. بۇل – وسىنداي اسا اۋىر جاعدايدا ءالى ەشقانداي ۇكىمەتتىڭ الدىندا بولىپ كورمەگەن وتە كۇردەلى دە اۋقىمدى مىندەت. حالىق ءبىزدىڭ جۇمىسىمىزدان ناقتى ناتيجە كۇتەدى»، —دەدى ءا. سمايىلوۆ.
وتىرىستا قر پرەزيدەنتى قاسىم-جومارت كەمەلۇلى توقاەۆتىڭ بيىلعى 11 قاڭتاردا پارلامەنت ماجىلىسىندە سويلەگەن سوزىندە بەرگەن تاپسىرمالارىن ورىنداۋ جونىندەگى شارالار قارالدى.
«ادىرنا» ۇلتتىق پورتالى
