ماڭعىستاۋلىقتار تەررورلىق شابۋىل كەزىندە قازا تاپقان كۋرسانتپەن قوشتاستى

ازا تۇتۋ راسىمىنە ماڭعىستاۋ وبلىسىنىڭ اكىمى، مەملەكەتتىك ورگان وكىلدەرى، ءماسليحات دەپۋتاتتارى، وڭىرلىك شەكارا قىزمەتىنىڭ جەكە قۇرامى، كۋرسانتتىڭ اتا-اناسى مەن تۋىستارى، مۇعالىمدەر مەن قالا تۇرعىندارى قاتىستى.

ءوڭىر باسشىسى نۇرلان نوعاەۆ بۇل قازانىڭ ءبىتىم اۋلەتىنىڭ عانا ەمەس، بارشا قازاقتىڭ ورتاق قايعىسى ەكەنىن اتاپ ءوتتى.

مەيىرحان ەرجانۇلى نەبارى 19 جاسىندا وتانعا ادال قىزمەت ەتۋدىڭ جارقىن ۇلگىسىن كورسەتىپ كەتتى. مەيىرحان باۋىرىمىزدىڭ ەرلىگىنىڭ الدىندا باسىمىزدى يەمىز. ونىڭ قايسارلىعى كوپكە ۇلگى-ونەگە بولارى ءسوزسىز،-دەدى نۇرلان نوعاەۆ.

مەملەكەت مۇددەسىن قورعاۋدا كورسەتكەن باتىلدىعى مەن جانقيارلىعى ءۇشىن پرەزيدەنت جارلىعىمەن مەيىرحان ءبىتىم قايتىس بولعاننان كەيىن III دارەجەلى "ايبىن" وردەنىمەن ماراپاتتالدى. ازا تۇتۋ ءراسىمى بارىسىندا ءبىر مينۋت ۇنسىزدىك جاريالانىپ، اۋاعا ءۇش رەت وق اتىلدى.

بۇل دۇربەلەڭدە ورىمدەي جاستاردىڭ قازا بولعانى جانىمىزعا قاتتى باتتى. ەلىنە قىزمەت ەتۋدى ارمانداعان نەمەرەم مەيىرحان انتىنا ادال بولدى. ەرجۇرەك بالام بەتپە-بەت كەلگەن اجالدان قايمىققان جوق. مۇنداي جاعدايدىڭ ەندى ەشقاشان قايتالانباعانىن تىلەيمىن. حالقىمىزدىڭ اۋىزبىرشىلىگى ارتىپ، بالالارىمىز بەيبىت كۇندە ءومىر ءسۇرسىن. جاراتقان تاۋەلسىزدىگىمىزدى ماڭگى ەتسىن،- دەدى مارقۇمنىڭ اتاسى ءبىتىم كەزباەۆ.