Qorǧanys ministrınıŋ orynbasary Daryn Tūiaqov äleumettık jelıde taraǧan videoǧa qatysty tüsınıkteme berdı, dep habarlaidy “Adyrna” ūlttyq portaly Stan.kz saityna sılteme jasap.
Beinerolikte äskeriler men qūqyq qorǧauşylar oiyn-sauyq oryndaryn aralap, äskerge şaqyrylǧan azamattardy anyqtap jür. Reid kezınde jastardyŋ jeke qūjattary tekserıledı.
"Ondai reidter köp jaǧdaida äskerge şaqyrylǧan adam uaqytynda kelıp, tırkeuge tūrmaǧan kezde bolyp jatady. Zaŋ boiynşa tiıstı räsımder bar. Sodan ötu kerek. Ärine, jergılıktı äskeri organdarǧa naqty mındet jüktelgen. Olar sol qyzmettık mındetın oryndaidy", - dedı Tūiaqov jurnalisterge bergen sūhbatynda.
Ministrdıŋ orynbasary sifrlandyru aiasynda aqparattyq bazalardy integrasiialau jūmystary atqarylyp jatqanyn da eske saldy. Sonyŋ arqasynda şūǧyl şeşımder qabyldanyp, qysqa uaqyttyŋ ışınde tekserıster bastalady.
"Sifrlandyrudyŋ arqasynda äskeri basqarmamyz jaqsy jūmys ıstei bastady", - dep atap öttı Tūiaqov.
Sondai-aq Daryn Tūiaqov qazır äskerge şaqyryluşylar tapşylyǧy joq ekenın aita kettı.
"Äskerge şaqyryluşylar bar, olar öz mındetterın säikesınşe oryndauy kerek. Otandy qorǧau mındetı baryn ūmytpauy tiıs", - dedı ol.
Būnymen qosa ministrdıŋ orynbasary mūndai reidter äsker qataryna alynuşylar arasynda kezeŋ-kezeŋımen jürgızıletının atap öttı.
Aita keterı, būǧan deiın äleumettık jelıde äskerge şaqyrylǧandardy anyqtauǧa arnalǧan reidtıŋ videosy taraǧan bolatyn.
Äskerge şaqyrudan jaltarǧan azamattarǧa qatysty reidter "äskeri qyzmet jäne äskeri qyzmetşılerdıŋ märtebesı turaly" Zaŋnyŋ 30-babyna säikes jürgızıledı. Şaqyru qaǧazyn äskerge şaqyryluşyǧa tapsyru mümkın bolmaǧan jaǧdaida polisiia jıgıttı şaqyru uchaskesıne aparuyna bolady.
Aita keterı, būǧan deiın äleumettık jelıde äskerge şaqyrylǧandardy anyqtau jūmystary tüngı klubtarda jürgızılıp, olardy sol jerden alyp ketkenı turaly video dau tuǧyzǧan bolatyn.
“Adyrna” ūlttyq portaly
