بۇگىن «سارىارقااۆتوپروم» جشس الاڭىندا مەملەكەت باسشىسىنىڭ ۇندەۋىن قولداعان «الليۋر» كومپانيالار توبى ولەگ پيروگقا وتاندىق شىعارىلعان Chevrolet Nexia اۆتوكولىگىنىڭ كىلتىن تابىس ەتتى. بۇل تۋرالى قوستاناي وبلىسىنىڭ اكىمى ارحيمەد مۇحامبەتوۆ ءمالىم ەتتى، دەپ حابارلايدى "ادىرنا" ۇلتتىق پورتالى.
«مەن، جاس قاھارمان ولەگكە ەل پرەزيدەنتى قاسىم-جومارت كەمەلۇلى توقاەۆتىڭ العىس حاتىن تابىس ەتتىم، ولەگ تە قر توتەنشە جاعدايلار مينيسترلىگىنىڭ «ورتتە كورسەتكەن قايسارلىعى ءۇشىن» مەدالىمەن ماراپاتتالدى. ولەگتىڭ اناسى ۆالەنتينا پيروگ قر العىس حاتىمەن ماراپاتتالدى»، - دەدى وبلىس اكىمى.
ەل پرەزيدەنتى ستۋدەنتتىڭ باتىلدىعى مەن قايسارلىعى ءۇشىن ريزاشىلىعىن ءبىلدىردى.
«وسىنداي جاس بولساڭىز دا ءسىز ناعىز ەرلىك جاسادىڭىز، قيىنشىلىقتا قالعان بالالارعا باتىلدىقپەن جانە ويلانباستان كومەككە كەلدىڭىز، ۇلكەن قايعىلى وقيعانىڭ الدىن الدىڭىز»، – دەپ جازدى مەملەكەت باسشىسى قاسىم-جومارت توقاەۆ.
«مەن ولەگتىڭ اتا-اناسىنا بالالارعا لايىقتى تاربيە بەرگەنى ءۇشىن تاعى دا العىسىمدى بىلدىرەمىن. ولەگتىڭ ارەكەتى بالالارعا عانا ەمەس، ەرەسەكتەرگە دە ۇلگى. بۇل رەتتە ديرەكتورلار كەڭەسىنىڭ توراعاسى اندرەي لاۆرەنتەۆتىڭ اتىنان «Allur» كومپانياسىنا مەملەكەت باسشىسىنىڭ باستاماسىن قولداعانى ءۇشىن العىس ايتقىم كەلەدى»، - دەپ جازدى اكىم.
ەسكە سالا كەتەيىك، قوستانايداعى «باعبان» ساياجايىندا 25 جەلتوقسان كۇنى تۇسكى ۋاقىتتا ءورت بولدى. بەسىنشى سىنىپ وقۋشىسى ولەگ پيروگ كوشەدە ويناپ ءجۇرىپ، قويۋ ءتۇتىندى كورگەن. كورشىلەردىڭ ساياجايى ورتەنگەن. ستۋدەنت ويلانباستان كومەككە ۇمتىلدى. ۇيدە ەكى جاستان سەگىز جاسقا دەيىنگى ءتورت بالا بولعان. ولاردى ورتەنىپ جاتقان عيماراتتان الىپ شىعىپ، كيىمدەرىن بەردى.
"ادىرنا" ۇلتتىق پورتالى
