حالىق قولداۋىمەن قۇرالاي مەيرامبەك «قازاقستان داۋىسى» مەگاجوباسىنىڭ جەڭىمپازى اتاندى. بايقاۋدىڭ اقتىق سىنىندا جوبادا ۇزدىك ونەر كورسەتىپ كەلگەن ءتورت قاتىسۋشى تارتىسقا ءتۇستى. ەرەجە بويىنشا قاتىسۋشىلار جەكە جانە ءوز تالىمگەرىمەن ونەرىن ورتاعا سالىپ، جەڭىمپاز كورەرمەننىڭ داۋىس بەرۋى ارقىلى شەشىلدى.
ناتيجەسىندە ءتورتىنشى ورىن ارۋجان ايداربەككە بۇيىرىپ، ءۇشىنشى ورىندى ەرنار اماندىق، ەكىنشى ورىندى ەرىك تولەنوۆ يەلەنسە، باس جۇلدەنى سىر ەلىنەن كەلگەن 18 جاستاعى قۇرالاي مەيرامبەك قانجىعاسىنا بايلادى.
دەگەنمەن، جوبانىڭ ءادىل بولماعانىن ايتىپ، نارازىلىعىن بىلدىرگەندەر دە تابىلدى. ءۇشىنشى ورىنعا يە بولعان ەرنار اماندىقتىڭ تالىمگەرى مايرا مۇحامەدقىزى فينالدا قازاق ءانىن شاكىرتىنەن باسقا ەشكىمنىڭ ارتىق ورىنداي الماعانىن ايتتى.
جەڭىسكە مەنىڭ بالام ءبىر قادام جەتپەي قالدى. كوبى «بەرىلگەن داۋىسىمىز قابىلدانبادى» دەپ شاعىم ايتىپ جاتىر. بۇل جەردە كىمدىكى دۇرىس، كىمدىكى بۇرىس ەكەنىن ايتا المايمىن. بىراق، مەنىڭ شاكىرتىم جان-جاقتى ونەر كورسەتتى. مەنىڭشە ءسال دە بولسا ادىلدىك جەتپەدى. قازاق ءانى مەن قازاق ونەرى ءۇشىن ەڭ بولماعاندا ەكىنشى ورىن الۋ كەرەك ەدى، - دەيدى مايرا مۇحامەدقىزى.
الايدا، قۇرالايدىڭ تالىمگەرى ساكەن مايعازيەۆ شاكىرتىنىڭ وزگەگە ۇقسامايتىن داۋىسى مەن ءان ايتۋ تەحنيكاسىن كاسىبي انشىلەردىڭ ءوزى قايتالاي المايتىنىن تىلگە تيەك ەتىپ، جەڭىس سىيلاعان كورەرمەنگە العىسىن ءبىلدىردى.
كوزى قاراقتى كورەرمەنگە العىسىمدى ايتقىم كەلەدى. قۇرالاي جەڭىسكە ابدەن لايىق. گۇلنۇر ورازىمبەتوۆانىڭ قۇرالايعا ىرىمداپ بەرگەن بوي تۇمارىن جاقسىلىققا بالادىم. گۇلنۇردىڭ رەپەرتۋارىنداعى انىمەن باستاپ، تولعاۋىمەن اياقتاعانىمىز دا بەكەر بولمادى. بۇل اندەر جەڭىسكە جەتەلەدى. حالىققا ريزاشىلىعىمدى بىلدىرەمىن.
اتالمىش مۋزىكالىق جوباعا قاتىسۋشىلار ەلىمىزدىڭ بارلىق وڭىرىنەن جانە شەت مەملەكەتتەردەن قاتىسىپ، تالانتىمەن تانىلدى. 6 مىڭعا جۋىق ءانشىنىڭ اراسىنان سۋرىلىپ شىققان قۇرالايدىڭ ونەرى، راسىندا، حالىقتى ءتانتى ەتتى. قۇرالاي مەيرامبەك بارلىق كەزەڭدە ەڭ مىقتى دەگەن اندەردى ورىنداپ، ەرەكشە يىرىمدەردى قوسىپ، حالىقتىڭ جۇرەگىنە جەتكىزۋگە تىرىسقانىن ايتتى.
بۇل جوبا ماعان سەنىمدىلىك بەردى. ءار كەز كورەرمەننەن شابىت الىپ وتىردىم. وسى جولى بىرلەسىپ تاڭداعان ءان حالىقتىڭ كوڭىلىنەن شىقتى دەپ ويلايمىن. سول سەبەپتى بۇل جەڭىسكە حالىقتىڭ ارقاسىندا جەتتىم. بارلىق قولداعان جاندارعا، قازاق ەلىنە، جەرلەستەرىمە راحمەت. ەرەكشە العىسىمدى تالىمگەرىم ساكەن اعاعا بىلدىرگىم كەلەدى. وسى كىسىنىڭ ارقاسىندا وسىنداي دارەجەگە جەتتىم، - دەپ تالىمگەرىنە ريزاشىلىعىن جەتكىزدى.
ونەرلى وتباسىندا دۇنيەگە كەلگەن ءانشىنىڭ اتا-اناسى مۋزىكا مامانى. ۇلكەن اپكەسى گۇلزات ادبىكارىموۆا بەلگىلى «قوڭىر» توبىنىڭ ءانشىسى. ەكىنشى اپكەسى ۇلپان ابدىكارىموۆا وپەرا سالاسىندا قىزمەت ىستەسە، اعاسى باقداۋلەت مەديتسينا سالاسىنىڭ قىزمەتكەرى بولسا دا ءاندى ناقىشىنا كەلتىرىپ ورىندايدى. ءۇيدىڭ كەنجەسى، 9-سىنىپ وقيتىن دۋلات ابدىكارىم دە بىرنەشە بايقاۋلاردىڭ جۇلدەگەرى اتانىپ ءجۇر. جوباعا قاتىسۋىن اسىعا كۇتكەن قۇرالاي ىرىكتەۋ كەزەڭى باستالعاندا ءوزىنىڭ ارمانىن اتا-اناسىنا ايتىپ، وتباسىنىڭ قولداۋىمەن ىرىكتەۋ كەزەڭنەن ءساتتى وتكەن. وسىلايشا جاس ءانشى جۇلدىزدى ومىرىنە قادام باسادى.
العاشقى تاجىريبەم وتباسىمنان باستاۋ الادى. وتباسىم ونەر ادامدارى بولعاندىقتان، ۇيدە مەنىڭ جاسىم جوباعا لايىق كەلىپ تۇرعاندىقتان اتا-انام رۇقساتىن بەردى، - دەيدى جەڭىمپاز.
سونىمەن قاتار، قۇرالاي مەيرامبەك جوبادان ۇتقان 5 ميلليون تەڭگەنى ارماندارىنا جۇمسايتىنىن ايتىپ، جوسپارىمەن دە ءبولىستى.
مەن بۇل قاراجاتتى ونەرىمە جۇمسايمىن جانە اتا-اناما كومەك رەتىندە بەرەمىن. وپەرا بولسىن، ءداستۇرلى ءان بولسىن بارلىق جانردا ەركىن شىرقاي الاتىن ءانشى بولعىم كەلەدى. وسى ارمانىمدى قولعا الىپ، الەمدىك ارەناعا شىعىپ، ەلىمنىڭ كوك تۋىن جەلبىرەتكىم كەلەدى.- دەيدى ءانشى.
كۇنى كەشە وتكەن «قازاقستان داۋىسى» جوباسىنىڭ جەڭىمپازى قۇرالاي مەيرامبەكتىڭ تالىمگەرى ساكەن مايعازيەۆ شاكىرتىنىڭ قاتەلىگىنە كوز جۇمىپ كەلگەن. ويتكەنى، قۇرالايدىڭ مۇكىندىگىنە قاراپ، جەڭىمپاز بولاتىنىن سەزگەن.
مەنىڭ توبىمداعى ون التى قاتىسۋشى دا «قازاقستان داۋىسى» اتاعىنا لايىقتى. دەگەنمەن، ساناۋلى ادام سانامدا ءجۇردى. ولار كەيبىر ساتسىزدىككە بايلانىستى جوبادان شىعىپ وتىردى. ونداي ساتسىزدىك قۇرالايدا دا بولدى. بىراق ءوزىمنىڭ ستراتەگيالىق جوسپارىم مەن بولجامىمدى جاسادىم. ءار ونەر كورسەتكەن سايىن قۇرالايدىڭ سان قىرلارى اشىلا بەردى. ونىڭ پوتەنتسيالىنا قاراپ «كورسەتكەننەن كورسەتەرى كوپ شىعار، بەرگەنىنەن بەرەرى كوپ شىعار» دەپ سوڭىنا دەيىن جەتەلەپ كەلدىم. سەزىمىم مەن ءۇمىتىمنىڭ الداماعانىنا تاڭىرگە شۇكىر دەيمىن.
الايدا، قۇرالاي مەيرامبەكتىڭ جوبا بويى تاڭداعان اندەرى تالقىعا سالىنىپ، سىنعا ۇشىرادى. كوپشىلىكتىڭ ايتۋى بويىنشا، كورمەي تاڭداۋ كەزەڭىندەگى «قورقىت-قوبىز» انىنەن باسقا ءاندى ءانشى ورىنداي الماعان.
قۇرالايدىڭ ورىنداعان اندەرىنىڭ ىشىندە ەرەكشە ۇناعانى، ارينە، ول الەمدى جاۋلاعان رامازان تايمانوۆتىڭ «قورقىت-قوبىز» ءانى. بىراق، باسقا قاتىسۋشىلار رەنجىمەسىن، ءدال قۇرالاي سياقتى ەستە قالارلىقتاي ءانى بولسا ول ءانشىنىڭ مىقتى ەكەنىنە كۇمان كەلتىرمەگەن بولار ەدىم. دەمەك، قۇرالايدىڭ كورسەتە الاتىنداي ءانى بار. بۇل ءان ونىڭ تولقۇجاتى. ال ودان بولەك فينالدا ورىنداعان تولعاۋى دا، اعىلشىنشا، تۇرىكشە ورىنداعان اندەرى دە ەرەكشە، عاجاپ، ءساتتى شىقتى دەپ ەسەپتەيمىن. سول سەبەپتى، قۇرالاي مەيرامبەك جەڭىسكە ابدەن لايىق بولدى.
جوبانىڭ شارتى بويىنشا، ساكەن مايعازيەۆ شاكىرتىمەن «مۋزارت» توبىنىڭ رەپەرتۋارىنداعى «زامان-اي» ءانىن ورىندادى. سودان كەيىن حالىقتان كەشىرىم سۇرادى.
ءومىر دەگەن تەپە-تەڭدىكتەن، اق پەن قارادان، كۇن مەن تۇننەن تۇرادى. مەنىڭ تاماعىمنىڭ اۋىرۋىن، دۋەتىمىزدىڭ ءساتسىز شىعۋىنىڭ ءوزىن مەن جاقسىلىققا بالادىم. ءبىر جاعىنان اللا سىناپ، ەكىنشى جاعىنان جەڭىستى ءناسىپ ەتتى. حالىقتىڭ الدىندا داۋسىمدى كورسەتە الماعانىم قۇرالايدىڭ جەڭىسىنىڭ قاسىندا تۇك ەمەس.
دەگەنمەن، دۋەتتىڭ ءساتسىز شىققانىنا قاراماستان تالىمگەر مەن شاكىرتى ورىنداعان ءان حالىق جۇرەگىنەن ورىن الدى. ناتيجەسىندە ەڭ جوعارعى ۇپايدى جينادى. ساكەن مايعازيەۆ جوبانىڭ ءادىل وتكەنىن، بارلىق قاتىسۋشىنىڭ دا «قازاقستان داۋىسى» اتاعىنا لايىق ەكەنىن ايتتى. سونىمەن قاتار، جەڭىس سىيلاعان حالىققا ىستىق ىقىلاسىن جەتكىزدى.
حالىققا العىستان باسقا ايتارىم جوق. قۇرالايدىڭ جانكۇيەرلەرىنىڭ بەلسەندىلىگىنە راحمەت. شىنىنا كەلسەك ءبىز سىزدەرمەن عانا ونەر ادامىمىز، كيەلى ساحنادا ونەر كورسەتىپ جۇرگەنىمىز تەك سىزدەردىڭ ارقاڭىز. اللا بارشاڭىزعا جار بولسىن، - دەپ اق تىلەگىن جولدادى.
ەسكە سالا كەتەيىك، التى ايعا سوزىلعان «قازاقستان داۋىسى» جوباسىنىڭ فينالى 25-جەلتوقساندا ءوتتى.
ايىم ابدراشيت،
"ادىرنا" ۇلتتىق پورتالى
