Qazaqstan dauysy ädıl öttı me?

Halyq qoldauymen Qūralai Meirambek «Qazaqstan dauysy» megajobasynyŋ jeŋımpazy atandy. Baiqaudyŋ aqtyq synynda jobada üzdık öner körsetıp kelgen tört qatysuşy tartysqa tüstı. Ereje boiynşa qatysuşylar jeke jäne öz tälımgerımen önerın ortaǧa salyp, jeŋımpaz körermennıŋ dauys beruı arqyly şeşıldı. Nätijesınde törtınşı oryn Arujan Aidarbekke būiyryp, üşınşı oryndy Ernar Amandyq, ekınşı oryndy Erık Tölenov ielense, bas jüldenı Syr elınen kelgen 18 jastaǧy Qūralai Meirambek qanjyǧasyna bailady. Degenmen, jobanyŋ ädıl bolmaǧanyn aityp, narazylyǧyn bıldırgender de tabyldy. Üşınşı orynǧa ie bolǧan Ernar Amandyqtyŋ tälımgerı Maira Mūhamedqyzy finalda qazaq änın şäkırtınen basqa eşkımnıŋ artyq oryndai almaǧanyn aitty.

Jeŋıske menıŋ balam bır qadam jetpei qaldy. Köbı «Berılgen dauysymyz qabyldanbady» dep şaǧym aityp jatyr. Būl jerde kımdıkı dūrys, kımdıkı būrys ekenın aita almaimyn. Bıraq, menıŋ şäkırtım jan-jaqty öner körsettı. Menıŋşe säl de bolsa ädıldık jetpedı. Qazaq änı men qazaq önerı üşın eŋ bolmaǧanda ekınşı oryn alu kerek edı, - deidı Maira Mūhamedqyzy.

Alaida, Qūralaidyŋ tälımgerı Säken Maiǧaziev şäkırtınıŋ özgege ūqsamaityn dauysy men än aitu tehnikasyn käsıbi änşılerdıŋ özı qaitalai almaitynyn tılge tiek etıp, jeŋıs syilaǧan körermenge alǧysyn bıldırdı.

Közı qaraqty körermenge alǧysymdy aitqym keledı. Qūralai jeŋıske äbden laiyq. Gülnūr Orazymbetovanyŋ Qūralaiǧa yrymdap bergen boi tūmaryn jaqsylyqqa baladym. Gülnūrdyŋ repertuaryndaǧy änımen bastap, tolǧauymen aiaqtaǧanymyz da beker bolmady. Būl änder jeŋıske jeteledı. Halyqqa rizaşylyǧymdy bıldıremın.

Atalmyş muzykalyq jobaǧa qatysuşylar elımızdıŋ barlyq öŋırınen jäne şet memleketterden qatysyp, talantymen tanyldy. 6 myŋǧa juyq änşınıŋ arasynan surylyp şyqqan Qūralaidyŋ önerı, rasynda, halyqty täntı ettı. Qūralai Meirambek barlyq kezeŋde eŋ myqty degen änderdı oryndap, erekşe iırımderdı qosyp, halyqtyŋ jüregıne jetkızuge tyrysqanyn aitty.

Būl joba maǧan senımdılık berdı. Är kez körermennen şabyt alyp otyrdym. Osy joly bırlesıp taŋdaǧan än halyqtyŋ köŋılınen şyqty dep oilaimyn. Sol sebeptı būl jeŋıske halyqtyŋ arqasynda jettım. Barlyq qoldaǧan jandarǧa, qazaq elıne, jerlesterıme rahmet. Erekşe alǧysymdy tälımgerım Säken aǧaǧa bıldırgım keledı. Osy kısınıŋ arqasynda osyndai därejege jettım, - dep tälımgerıne rizaşylyǧyn jetkızdı.

Önerlı otbasynda düniege kelgen änşınıŋ ata-anasy muzyka mamany. Ülken äpkesı Gülzät Ädbıkärımova belgılı «Qoŋyr» tobynyŋ änşısı. Ekınşı äpkesı Ūlpan Äbdıkärımova opera salasynda qyzmet ıstese, aǧasy Baqdaulet medisina salasynyŋ qyzmetkerı bolsa da ändı naqyşyna keltırıp oryndaidy. Üidıŋ kenjesı, 9-synyp oqityn Dulat Äbdıkärım de bırneşe baiqaulardyŋ jüldegerı atanyp jür. Jobaǧa qatysuyn asyǧa kütken Qūralai ırıkteu kezeŋı bastalǧanda özınıŋ armanyn ata-anasyna aityp, otbasynyŋ qoldauymen ırıkteu kezeŋnen sättı ötken. Osylaişa jas änşı jūldyzdy ömırıne qadam basady.

Alǧaşqy täjıribem otbasymnan bastau alady. Otbasym öner adamdary bolǧandyqtan, üide menıŋ jasym jobaǧa laiyq kelıp tūrǧandyqtan ata-anam rūqsatyn berdı, - deidı jeŋımpaz.

Sonymen qatar, Qūralai Meirambek jobadan ūtqan 5 million teŋgenı armandaryna jūmsaitynyn aityp, josparymen de bölıstı.

Men būl qarajatty önerıme jūmsaimyn jäne ata-anama kömek retınde beremın. Opera bolsyn, dästürlı än bolsyn barlyq janrda erkın şyrqai alatyn änşı bolǧym keledı. Osy armanymdy qolǧa alyp, älemdık arenaǧa şyǧyp, elımnıŋ kök tuyn jelbıretkım keledı.- deidı änşı.

Künı keşe ötken «Qazaqstan dauysy» jobasynyŋ jeŋımpazy Qūralai Meirambektıŋ tälımgerı Säken Maiǧaziev şäkırtınıŋ qatelıgıne köz jūmyp kelgen. Öitkenı, Qūralaidyŋ mükındıgıne qarap, jeŋımpaz bolatynyn sezgen.

Menıŋ tobymdaǧy on alty qatysuşy da «Qazaqstan dauysy» ataǧyna laiyqty. Degenmen, sanauly adam sanamda jürdı. Olar keibır sätsızdıkke bailanysty jobadan şyǧyp otyrdy. Ondai sätsızdık Qūralaida da boldy. Bıraq özımnıŋ strategiialyq josparym men boljamymdy jasadym. Är öner körsetken saiyn Qūralaidyŋ san qyrlary aşyla berdı. Onyŋ potensialyna qarap «Körsetkennen körseterı köp şyǧar, bergenınen bererı köp şyǧar» dep soŋyna deiın jetelep keldım. Sezımım men ümıtımnıŋ aldamaǧanyna täŋırge şükır deimın.

Alaida, Qūralai Meirambektıŋ joba boiy taŋdaǧan änderı talqyǧa salynyp, synǧa ūşyrady. Köpşılıktıŋ aituy boiynşa, körmei taŋdau kezeŋındegı «Qorqyt-qobyz» änınen basqa ändı änşı oryndai almaǧan.

Qūralaidyŋ oryndaǧan änderınıŋ ışınde erekşe ūnaǧany, ärine, ol älemdı jaulaǧan Ramazan Taimanovtyŋ «Qorqyt-qobyz» änı. Bıraq, basqa qatysuşylar renjımesın, däl Qūralai siiaqty este qalarlyqtai änı bolsa ol änşınıŋ myqty ekenıne kümän keltırmegen bolar edım. Demek, Qūralaidyŋ körsete alatyndai änı bar. Būl än onyŋ tölqūjaty. Al odan bölek finalda oryndaǧan tolǧauy da, aǧylşynşa, türıkşe oryndaǧan änderı de erekşe, ǧajap, sättı şyqty dep esepteimın. Sol sebeptı, Qūralai Meirambek jeŋıske äbden laiyq boldy.

Jobanyŋ şarty boiynşa, Säken Maiǧaziev şäkırtımen «MuzArt» tobynyŋ repertuaryndaǧy «Zaman-ai» änın oryndady. Sodan keiın halyqtan keşırım sūrady.

Ömır degen tepe-teŋdıkten, aq pen qaradan, kün men tünnen tūrady. Menıŋ tamaǧymnyŋ auyruyn, duetımızdıŋ sätsız şyǧuynyŋ özın men jaqsylyqqa baladym. Bır jaǧynan Alla synap, ekınşı jaǧynan jeŋıstı näsıp ettı. Halyqtyŋ aldynda dausymdy körsete almaǧanym Qūralaidyŋ jeŋısınıŋ qasynda tük emes.

Degenmen, duettıŋ sätsız şyqqanyna qaramastan tälımger men şäkırtı oryndaǧan än halyq jüregınen oryn aldy. Nätijesınde eŋ joǧarǧy ūpaidy jinady. Säken Maiǧaziev jobanyŋ ädıl ötkenın, barlyq qatysuşynyŋ da «Qazaqstan dauysy» ataǧyna laiyq ekenın aitty. Sonymen qatar, jeŋıs syilaǧan halyqqa ystyq yqylasyn jetkızdı.

Halyqqa alǧystan basqa aitarym joq. Qūralaidyŋ janküierlerınıŋ belsendılıgıne rahmet. Şynyna kelsek bız sızdermen ǧana öner adamymyz, kielı sahnada öner körsetıp jürgenımız tek sızderdıŋ arqaŋyz. Alla barşaŋyzǧa jar bolsyn, - dep aq tılegın joldady.

Eske sala keteiık, alty aiǧa sozylǧan «Qazaqstan dauysy» jobasynyŋ finaly 25-jeltoqsanda öttı.

Aiym ABDRAŞİT,

"Adyrna" ūlttyq portaly