باقىتگۇل حامەنوۆا ءالى دە جۇمىسىنان بوساتىلمادى

5117
Adyrna.kz Telegram

باقىتگۇل حامەنوۆا تەرگەۋدىڭ بىتكەنىن تۇرمەدە كۇتەتىن بولدى تەرگەۋدىڭ بىتكەنىن اقىرى تۇرمەدە كۇتەتىن بولدى. پروكۋرورلاردىڭ تالابىنان سوڭ، سوت باقىتگۇل حامەنوۆاعا قاتىستى شەشىمىن قايتا وزگەرتتى. اتىراۋ وبلىسى اكىمىنىڭ ورىنباسارى ون كۇن بۇرىن عانا ۇيقاماققا اۋىستىرىلعان بولاتىن، دەپ حابارلايدى “ادىرنا” ۇلتتىق پورتالى كتك تەلەارناسىنا سىلتەمە جاساپ. 

ال شەشىمنىڭ وزگەرۋىن سوتتاعىلار تاعىلعان ايىپتىڭ اۋىرلىعىمەن ءتۇسىندىردى. ونىڭ ۇستىنە حامەنوۆا ۇيىندە جۇرسە قىزمەتىن، ىقپالدى تامىر-تانىستارىن پايدالانىپ تەرگەۋگە كەدەرگى كەلتىرۋى ىقتيمال دەپ تاۋىپتى.

ەگەر تاعىلعان ايىپ بويىنشا شەنەۋنىك كىنالى دەپ تانىلسا، 12 جىلعا دەيىن باس بوستاندىعىنان ايىرىلۋى مۇمكىن. اتىراۋ وبلىسى اكىمىنىڭ ورىنباسارى اباي ەسكەرتكىشىنە  بولىنگەن 145 ميلليون تەڭگەدەن اۋىزباستىرىق الدى دەگەن كۇدىكپەن ەكى اپتا بۇرىن ۇستالعان بولاتىن. ونىمەن قوسا اتىراۋ وبلىسى مادەنيەت باسقارماسىنىڭ باسشىسى دا ۇستالعان.

بىراق اقىلبەك رىسقاليەۆ ءوز كىناسىن بىردەن مويىنداپ، تەرگەۋشىلەرگە كومەك بەرگەنى ءۇشىن قاماۋعا الىنبادى. ال حامەنوۆا تەمىر تورعا قايتا قامالعانىمەن، قىزمەتىنەن ءالى رەسمي تۇردە بوساتىلماپتى.

  ەرجان تولەك، اتىراۋ وبلىسى اكىمىنىڭ ءباسپاسوز حاتشىسى:

- وتكەن جولى ايتقانىمداي، قازىر سوتتان ەشقانداي شەشىم كەلگەن جوق. قازىر تەرگەۋ يزولياتورىندا جاتقانىن وزدەرىڭىز بىلەسىزدەر. سوندىقتان جالاقى جۇرمەيدى، جۇمىستا بولماۋىنا بايلانىستى. وعان قاراستى باسقارمالار قازىر اكىمنىڭ وزگە ورىنباسارلارىنا ءبولىنىپ بەرىلدى. قازىر سول كىسىلەر جاۋاپتى.

“ادىرنا” ۇلتتىق پورتالى

 

پىكىرلەر