رەسەيدە تۇركى قاۋىمداستىقتارىنىڭ ءومىرى تۋرالى دەرەكتى فيلم ءتۇسىرىپ جۇرگەن تۇرىك باسىلىمىنىڭ ەكى رەداكتورى — نازگۇل كەنجەتاي مەن ەمين كاراچاك قاماۋعا الىندى دەپ حابارلايدى "ادىرنا" ۇلتتىق پورتالى "Anadolu" اگەنتتىگىنە سىلتەمە جاساپ.
ولاردى ەكسترەميزمگە قارسى ءىس-قيمىل ءبولىمىنىڭ قىزمەتكەرلەرى ۇستاعان. جۋرناليستەردىڭ زاتتارى تاركىلەندى. ولار تۇسىرگەن بارلىق ماتەريالدار جويىلعان، ال ەكەۋى دە اباكانداعى ۋاقىتشا ۇستاۋ پۋنكتىندە جاقىن ۋاقىتتاعى دەپورتاتسياعا دايىندالىپ جاتىر.
كەنجەتايدىڭ ايتۋىنشا، ونى كراسنويارسك ارقىلى قازاقستانعا، ال ارىپتەسىن تۇركياعا جىبەرۋ كەرەك. الايدا كەنجەتاي مەن كاراچاك بيلىك قاماۋدا ۇستاۋ مەرزىمىن ۇزارتۋ ءۇشىن ولاردى شىعارۋ پروتسەسىن كەشىكتىرىپ جاتىر دەپ حابارلايدى. جۋرناليستەردىڭ ايتۋىنشا، اباكانداعى كامەرالارىندا جىلۋ مەن ىستىق سۋ جوق. ولار كۇنىنە ەكى رەت قانا تازا اۋامەن تىنىستاۋعا شىعا الادى. ال تەلەفوندارى ۇنەمى باقىلاۋدا. سونداي-اق كامەرالاردا تاۋلىك بويى بەينەباقىلاۋ جۇرگىزىلەدى. بۇل ۇستالعانداردىڭ قۇقىقتارىن بۇزادى.
"IslamNews" اقپاراتى بويىنشا، كەنجەتاي – تۇرىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن تۇركيادا تۇراتىن قازاقستان ازاماتى. ول تاياۋ شىعىستىڭ ىستىق نۇكتەلەرىنەن فوتورەپورتاجدار توپتاماسى ءۇشىن «قازاقستاننىڭ 100 جاڭا ەسىمى» ۇلتتىق جوباسىنا ەندى. ەمين كاراچاكپەن بىرگە حاكاسياعا بارار الدىندا ياكۋتيا، بۋرياتيا جانە التايداعى تۇركى حالىقتارىنىڭ ءومىرى تۋرالى بىرنەشە سيۋجەت تۇسىرگەن. سونىمەن قاتار يركۋتسك وبلىسىنداعى توفا حالقىمەن دە جولىققان.
ال "سيبير.رەالي" باسىلىمى حابارلاعانداي، 17 جەلتوقسان كۇنى اباكان قالالىق سوتى كەنجەتاي مەن قاراچاكتى شەتەلدىك ازاماتتىڭ رەسەيگە كىرۋ ەرەجەلەرىن بىرنەشە رەت بۇزعانى ءۇشىن كىنالى دەپ تاپتى. سوتتى قولداعان ءىىم نۇسقاسى بويىنشا، بلوگەرلەر باق-قا ۆيدەو تۇسىرگەن، بىراق حاكاسيادا اككرەديتاتسياسىز جۇمىس ىستەدى: بۇل ءۇشىن ولارعا 5 مىڭ رۋبل ايىپپۇل سالىندى. بۇعان دەيىن كەنجەتاي مەن ونىڭ سەرىكتەسىنە ياكۋتيادا وسىعان ۇقساس باپ بويىنشا ايىپپۇل سالىنعان بولاتىن.
تۇرىك مەملەكەتتىك اگەنتتىگى رەسەيلىك باق-تا: "كەنجەتاي مەن كاراچاكتىڭ رەسەيگە قارسى ۇگىت-ناسيحات جۇرگىزىپ، تىڭشىلىقپەن اينالىسقانى، تۇركى حالىقتارىنىڭ رەسەي باسشىلىعىمەن قيىن جاعدايدا ءومىر ءسۇرىپ جاتقانىن جانە يسلامدى تاراتقانى تۋرالى نەگىزسىز مالىمدەمەلەرى بار ماتەريالدار جاريالاندى" دەپ اتاپ ءوتتى.
الايدا حاكاسياداعى تۇرىكتەر جۋرناليستەردىڭ اۋىر جاعدايىن ءبىلىپ، كەنجەتاي مەن قاراچاكقا تاماق پەن سۋ اپارعان.
"ادىرنا" ۇلتتىق پورتالى
