الماتىنى سۋمەن قامتاماسىز ەتەتىن ءارى كارىز جۇيەلەرىنىڭ جۇمىسىن قاداعالايتىن "الماتى سۋدىڭ" 100-دەن استام قىزمەتكەرى جۇمىسقا شىعۋدان باس تارتتى. ايتۋلارىنشا جالاقىلارى تىم از. بۇدان بولەك قىزمەتتىك كيىمدەرىنىڭ ساپاسى سىن كوتەرمەيدى. جۇمىستاعى ەڭبەك قاۋىپسىزدىگى دە ساقتالا بەرمەيدى ەكەن، دەپ حابارلايدى “ادىرنا” ۇلتتىق پورتالى 31-ارنانىڭ
"الماتى سۋدىڭ" 100-دەن استام قىزمەتكەرى جۇمىسقا شىعۋدان باس تارتتى
23.12.2021
2511
تاڭعى ساعات جەتىدەن باستاپ جينالعان جۇمىسشىلار مەكەمە ىشىنە كىرە المادى. الايدا باسشىلىقتان بۇرىن پوليتسەيلەر جەتكەن. ەسىك اشىلعان سوڭ جۇمىسشىلار ءوز تالاپتارىن جەتكىزدى.
"قاراعىم-اۋ. ناقتى جاۋاپ بەرشى ەر جىگىت ۇقساپ. قاشان كوتەرەدى؟ توقاەۆ، مىسالى، ەڭ تومەنگى جالاقىنى 42 500 دەن 60 000-عا كوتەرىپ وتىر", - دەدى مەكەمە جۇمىسشىسى قايرات ەردەباەۆ.
"قانشاما جىگىتتەر كەتىپ قالىپ جاتىر. سوعان كاسىپوداقتان ماتەريالدىق كومەك بەرۋ كەرەك. كومەك سۇراساڭ جاڭاعىنداي ءبىر جيىرما مىڭ بەرىپ جاس بالانى الداعانداي الداپ قويادى. باياعى جارتاس سول جارتاس دەگەندەي سول ءجۇز مىڭنان ون بەس مىڭ قوستى، سونىڭ وزىمەن ءالى كەلە جاتىرمىز مىنە. ونىڭ ءوزى ناۋرىزدا عانا. ءجۇز مىڭ دەيمىز", - دەپ مالىمدەدى "الماتى سۋ" مەكەمەسىنىڭ كولىك جۇرگىزۋشىسى نۇربولات بەيسەەۆ.
جۇمىسشىلار قالادا جاڭا اۋداندار كوبەيىپ جاتسا دا، جالاقىنىڭ مۇلدەم وسپەيتىنىن تۇسىنە الماي دال. ال مەكەمەنىڭ رەسمي وكىلى 2024 جىلعا دەيىن تاريف بەكىتىلگەندىكتەن جالاقى وزگەرمەيدى دەپ كەسىپ ايتتى.
"ياعني قازىر قالادا سۋدىڭ باعاسى 48 تەڭگە، كارىز جۇيەسى 25 تەڭگە. سوعان بايلانىستى جالاقى بولادى", - دەدى “الماتى سۋ” مكك رەسمي وكىلى سەرىك شاگيروۆ.
جۇمىسشىلار تارقاعاندا كەلگەن الماتى سۋدىڭ ديرەكتورى كومپانيانىڭ قارىزى 400 ميلليون تەڭگەدەن اسىپ كەتكەنىن ايتقان.
"قازىر ايتا المايمىن. وسى بيىلعى جىلى بىلتىرعى جىلدىڭ قارىزدارى جابىلدى. قازىر 441 ميلليون تەڭگە قارىز بار. سوندىقتان مەملەكەتتەن سۋبسيديا سۇراپ وتىرمىز", - دەدى "الماتى سۋ" مكك باس ديرەكتورى قايرات ادراسيلوۆ.
ەندى مۇنداعى جۇمىسشىلار تالاپتارىمىز ورىندالماسا اكىمدىككە شاعىمدانامىز دەپ وتىر.
”ادىرنا” ۇلتتىق پورتالى
Басқалармен бөлісе отырыңыз
پىكىرلەر
