تۇركيادا قازاقستان ازاماتتارى جەرورتا تەڭىزى جاعالاۋىنان پاتەرلەر مەن ۆيللالاردى بەلسەندى تۇردە ساتىپ الىپ جاتىر، - دەپ حابارلايدى “ادىرنا” ۇلتتىق پورتالى كتك تەلەارناسىنا سىلتەمە جاساپ.
تۇرىك اقپارات قۇرالدارى مالىمەتىنشە، كەيىنگى ءبىر ايدا 300-گە جۋىق قازاقستاندىق تەڭىز جاعالاۋىنان پاتەر ساتىپ العان. بۇل ەلدىڭ ءىرى قالالارى مەن سولتۇستىك كيپردى ەسەپكە الماعاندا.
"2021 جىلدان بەرى جىلجىمايتىن مۇلىك باعاسى 30 پايىزعا، جالداۋ اقىسى 50 پايىزعا ءوستى. دەگەنمەن باسپاناعا سۇرانىس تومەندەگەن جوق. ونى، نەگىزىنەن، شەتەلدىكتەر ساتىپ الادى. ەڭ كوپ سۇرانىس رەسەيلىكتەر مەن قازاقستاندىقتار اراسىندا", - دەدى ريەلتور دجيحانگير گوكلەر.
شەتەلدىكتەر ءۇشىن تۇرعىن ءۇي ساتىپ الۋ تۇركيادا تۇرۋعا رۇقسات الۋعا مۇمكىندىك بەرەدى. بۇل ساتىپ الۋشىلاردى تارتادى.
"بۇل جەردە 50ح50. مۇندا تۇرۋعا كەلەتىندەر بار. دەمالۋعا كەلەتىندەر بار", - دەيدى ريەلتور ميربەك تۇرماعامبەتوۆ.
دەگەنمەن قازاقستاندىقتار تۇركيادا جىلجىمايتىن مۇلىكتى تەك ينۆەستيتسيالىق تارتىمدىلىق ءۇشىن عانا ساتىپ المايدى. ساراپشىلار پايىمداۋىنشا، وسىلايشا ازاماتتار قولدا بار كاپيتالىن ساقتاپ قالۋعا تىرىسادى. ونىڭ ۇستىنە، ونداعى باسپانا ۇلتتىق ۆاليۋتامەن ەمەس، ەۋرومەن ساتىلادى.
"قازىر تۇركياعا بەلسەندى تۇردە ينۆەستيتسيا سالىپ جاتقان قازاقستاندىقتاردىڭ ەداۋىر بولىگى سوندا تۇرادى. بۇل، نەگىزىنەن تاياۋ جىلدارداعى تۇراقتىلىق بەلگىسىز بولۋىنا بايلانىستى: ەكونوميكالىق تا، ساياسي دا. تۇركيانىڭ كليماتى وتە قولايلى، باعاسى وتە تومەن، ءومىر ءسۇرۋ قۇنى تومەن، ءومىر ءسۇرۋ ساپاسى سالىستىرمالى تۇردە جوعارى", - دەپ ءتۇسىندىردى ەكونوميست راحىم وشاقباەۆ.
جىلجىمايتىن مۇلىك اگەنتتىكتەرى مالىمەتى بويىنشا، قازاقستاندىقتار تۇركيادا وسى ايدا ساتىپ الىنعان ۇيلەر سانى بويىنشا قازىر بەسىنشى ورىندا تۇر. تەك يران، يراك، رەسەي جانە گەرمانيا ازاماتتارى كوش باسىندا.
”ادىرنا” ۇلتتىق پورتالى
Басқалармен бөлісе отырыңыз
