قازاقستاندا جاڭا 4 تۇرمە سالىنباق

2824
Adyrna.kz Telegram

الداعى ءۇش جىلدا قازاقستاندا سوتتالعاندارعا ارنالعان جاڭا 4 كولونيا سالىنادى دەپ جوسپارلانۋدا، دەپ حابارلايدى “ادىرنا” ۇلتتىق پورتالى وردا.كز سايتىنا سىلتەمە جاساپ. 

قۇرىلىسىن 2022 جىلدىڭ باسىندا باستاۋدى كوزدەپ وتىر. ولار الماتى، اقتوبە، ماڭعىستاۋ جانە تۇركىستان وبلىستارىندا سالىنادى. بۇل تۋرالى قىلمىستىق اتقارۋ جۇيەسى كوميتەتىنىڭ توراعاسى مالىمدەدى.

جانات ەشماعامبەتوۆتىڭ ايتۋىنشا، ءمجا اياسىندا جوبالار جۇزەگە اسىرىلۋدا. الدىن الا مالىمەت بويىنشا، ءىرى قازاقستاندىق قۇرىلىس سالۋشىلارىنىڭ ءبىرى ينۆەستور بولۋى مۇمكىن.

كۋيس باسشىسى قازاقستانداعى تۇزەۋ مەكەمەلەرىنىڭ 80 پايىزى حالىقارالىق ستاندارتتارعا ساي كەلمەيتىنىن اتاپ ءوتتى. بۇل ولاردىڭ بارلىعى وتە ەرتەدە سالىنعانىنا بايلانىستى.

«ءبىز ويلاعانداي كولونيا قازاقستاندا ەشقاشان سالىنباعان. ءبىز بۇل جەردە حالىقارالىق تاجىريبەنى ەسكەرەمىز. بىزگە كومەكتەسىپ جاتقان بۇۇ ساراپشىلارىن شاقىردىق. ويتكەنى پەنيتەنتسيارلىق مەكەمەلەردىڭ ينفراقۇرىلىمىنا بەلگىلى الەمدىك تالاپتار بار. ءبىز جوبالىق-سمەتالىق قۇجاتتامانى ازىرلەگەننەن كەيىن سايكەس ءمجا راسىمدەرى بار، باسەكەگە قابىلەتتى. بۇل قۇجاتتار مەملەكەتتىك ساراپتامادان وتەدى، سودان كەيىن باعا قۇنى ازدى-كوپتى انىق بولادى»، - دەدى ەشماعامبەتوۆ.

ەشماعامبەتوۆ قازاقستاندا جەكە تۇرمەلەر بولمايتىنىن دا ايتتى.

”ادىرنا” ۇلتتىق پورتالى

پىكىرلەر