وزبەكستاننىڭ فەرعانا وبلىسىندا جەرگىلىكتى بيلىك شەنەۋنىكتەر اراسىندا سالاۋاتتى ءومىر سالتى مەن دۇرىس تاماقتانۋدى ناسيحاتتاۋ ماقساتىندا ەكسپەريمەنت جۇرگىزۋگە باستاماشى بولدى. بۇل تۋرالى بۇگىن، 21 جەلتوقساندا 24.kg اقپارات اگەنتتىگى حابارلادى.
ۆەدومستۆونىڭ مالىمەتىنشە، ارتىق سالماعى بار مەملەكەتتىك قىزمەتكەرلەر جوعالتقان ءاربىر كەلىسى ءۇشىن جالاقىلارىنا قوسىمشا 500 مىڭ سۋم (شامامەن قازاقستاندىق تەڭگەمەن 20 500 تگ) الادى.
«بۇل فەرعانانىڭ تاجىريبەسى، ونى بارلىق رەسپۋبليكا بويىنشا قولدانۋعا بولادى. شەنەۋنىكتەر ءار قايسىسى ءبىر كەلىدەن ارىقتاسا، 500 مىڭ سۋم الادى. ياعني، 5 كەلىگە ارىقتاعان مەملەكەتتىك قىزمەتكەر 2,5 ميلليون سۋم الادى»، - دەدى ايماق باسشىسى حايرۋللو بوزوروۆ.
حايرۋللو بوزوروۆ شەنەۋنىكتەرمەن قاتار قاراپايىم وبلىس تۇرعىندارىنا دا جەرگىلىكتى ەمحانالارعا جازىلۋدى ۇسىندى.
"ادىرنا" ۇلتتىق پورتالى
